بۇگىن استانادا تۇركى مەملەكەتتەرى ۇيىمىنىڭ باسشىلارى باس قوسادى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
بيىل تۇركى مەملەكەتتەرى ۇيىمى باسشىلارىنىڭ مەرەيتويلىق ءسامميتىن قازاقستان ۇيىمداستىرىپ جاتىر.
اۋقىمدى شاراعا ۇيىمعا مۇشە مەملەكەتتەر – ازەربايجان، قىرعىزستان، تۇركيا جانە وزبەكستان باسشىلارى قاتىسادى. سونداي-اق سامميت جۇمىسىنا ماجارستان مەن تۇرىكمەنستان باقىلاۋشى ەل رەتىندە قاتىسادى.
بۇل قۇرىلىم ءاۋ باستا «تۇركىتىلدەس مەملەكەتتەردىڭ ىنتىماقتاستىق كەڭەسى» دەپ اتالعان. كەيىن «تۇركى مەملەكەتتەرى ۇيىمى» بولىپ وزگەردى. 2021 جىلى ىستامبۇلدا وتكەن سامميتتە باۋىرلاس ەلدەر باسشىلارى وسىلاي دەپ وزگەرتۋگە كەلىستى. قۇرىلىمعا مۇشە ەلدەر باسشىلارىنىڭ العاشقى ءسامميتى 2011 جىلى الماتىدا وتكەن. ال بىلتىر سامارقاندا وتكەن سامميتتە كەلەسى جيىننىڭ استانادا وتەتىنى بەلگىلى بولدى.
تۇركى الەمىنىڭ اتاجۇرتى سانالعان قازاقستان ۇيىمعا مۇشە بارلىق ەلمەن جان-جاقتى قارىم-قاتىناستى دامىتۋعا ايرىقشا ءمان بەرەدى.
«قازىرگى الماعايىپ كەزەڭدە كولىك-ترانزيت كوممۋنيكاتسياسىنىڭ الەۋەتىن ارتتىرۋ جانە ونىڭ مۇمكىندىگىن بارىنشا پايدالانۋ اسا ماڭىزدى. سەبەبى ءبىزدىڭ مەملەكەتتەرىمىز باتىس پەن شىعىستى، سولتۇستىك پەن وڭتۇستىكتى تىكەلەي بايلانىستىرادى. قازاقستان، ازەربايجان، تۇركيا ارقىلى وتەتىن ترانسكاسپي حالىقارالىق كولىك ءدالىزى – سونىڭ جارقىن مىسالى. سونداي-اق بۇل ۇيىمنىڭ حالىقارالىق ارەنادا مارتەبەسى ءوسىپ كەلەدى. مۇندا كوتەرىلگەن بىرقاتار ماسەلە شەشىمىن تاپتى»،—دەدى پرەزيدەنت جانىنداعى قسزي باس ساراپشىسى بولات اۋەلباەۆ.
تۇركى ىنتىماقتاستىعىنا ۇيىتقى بولعان ۇيىمداردىڭ تاريحىن زەردەلەسەك، ولاردىڭ كوپشىلىگىنە قازاقستان باستاماشى بولعان. تۇرىكسوي، تۇركپا جانە تۇركى اكادەمياسى – سونىڭ ايقىن دالەلى. بۇل ۇيىمدار باۋىرلاس ەلدەردىڭ مادەني-رۋحاني جاقىنداسۋىنا ولشەۋسىز ۇلەس قوسىپ وتىر. اسىرەسە كەيىنگى جىلدارى ۇيىم اياسىنداعى بايلانىستار نىعايا تۇسكەن. قازاقستاننىڭ تۇركى مەملەكەتتەرى ۇيىمىنا مۇشە ەلدەرمەن ءوزارا تاۋار اينالىمى دا ارتا ءتۇستى. دالىرەك ايتقاندا، 2010–2022 جىلدار ارالىعىندا ەلىمىزدىڭ ۇيىمعا مۇشە ەلدەرمەن اراداعى تاۋار اينالىمى 3 ەسە ءوستى. ءسويتىپ، 4,5 ملرد دوللارلىق كولەمنەن 12,9 ملرد دوللارعا جەتتى. ماسەلەن، جاقىندا عانا ەلىمىزدىڭ پارلامەنتى تۇركى ينۆەستيتسيالىق قورىن قۇرۋ تۋرالى كەلىسىم راتيفيكاتسيالادى. بۇل دەگەنىمىز تۇركى مەملەكەتتەرىنىڭ ەكونوميكالىق دامۋىنا ماڭىزدى سەرپىن بەرىلمەك.
ەسكە سالا كەتەيىك، ناۋرىز ايىندا مەملەكەت باسشىسى تۇركى مەملەكەتتەرى ۇيىمىنىڭ مەرەيتويلىق ءسامميتى تۇركىستاندا وتەتىنىن ايتقان ەدى.
