زەلەنسكي رەسەيمەن كەز كەلگەن فورماتتا كەلىسسوز جۇرگىزۋگە دايىن ەكەنىن ايتتى

فوتو: pixabay.com

ۋكراينا رەسەيمەن كەز كەلگەن فورماتتا جانە كەز كەلگەن ەلدە كەلىسسوز جۇرگىزۋگە دايىن. ونىڭ ىشىندە ۋكراينا پرەزيدەنتى ۆلاديمير زەلەنسكيدىڭ رەسەي باسشىسى ۆلاديمير پۋتينمەن كەزدەسۋى دە بار. بۇل تۋرالى زەلەنسكي X الەۋمەتتىك جەلىسىندە جازدى، دەپ حابارلايدى “ادىرنا”.

ونىڭ ايتۋىنشا، اقش كەلەسى اپتادا ۋكراينا مەن امەريكا دەلەگاتسيالارىنىڭ كەزدەسۋىن وتكىزۋدى ۇسىنعان.

ء«بىز كەز كەلگەن جەردە جانە كەز كەلگەن فورماتتا: ۇشجاقتى، ەكىجاقتى، تورتجاقتى نەمەسە “بەس جانە ودان دا كوپ” فورماتىندا كەلىسسوز جۇرگىزۋگە دايىنبىز. ەڭ باستىسى – بەيبىتشىلىككە قول جەتكىزۋ»، – دەپ جازدى ۋكراينا پرەزيدەنتى.

زەلەنسكي اقش-تىڭ رەسەي پرەزيدەنتى ۆلاديمير پۋتينگە قىسىمدى كۇشەيتكەنىن قالايتىنىن اتاپ ءوتتى. ونىڭ پىكىرىنشە، قىسىم كيەۆكە ەمەس، ماسكەۋگە باعىتتالۋى كەرەك. ايتپەسە، مۇنداي ۇستانىم ادىلەتسىز بولماق.

سونداي-اق ۋكراينا باسشىسى رەسەيمەن كەلىسسوز جۇرگىزۋ ءۇشىن ەۋروپانىڭ جەكە ديپلوماتيالىق ارناسىن قۇرۋ قاجەتتىگىن ايتتى. ونىڭ سوزىنشە، سوعىستى توقتاتۋ ءۇشىن بارلىق مۇمكىندىكتى پايدالانۋ قاجەت.

بۇدان بولەك، كيەۆ تۇركيا پرەزيدەنتى رەجەپ تايپ ەردوعانمەن تەڭىزدەگى قاۋىپسىزدىك پەن ازىق-تۇلىك قاۋىپسىزدىگى ماسەلەلەرى بويىنشا جەكە كەلىسسوز وتكىزۋدى جوسپارلاپ وتىر. ۋكراينا تاراپى تاياۋ شىعىس ەلدەرىنىڭ وكىلدەرىمەن دە جاعدايدى تالقىلاماق.

زەلەنسكيدىڭ مالىمەتىنشە، اقش ۋكراينا مەن رەسەيدىڭ قاتىسۋىمەن ۇشجاقتى كەزدەسۋ وتكىزۋدى قاراستىرىپ جاتىر. كەزدەسۋ وتەتىن ىقتيمال ورىنداردىڭ قاتارىندا بىرىككەن اراب امىرلىكتەرى مەن ساۋد ارابياسى بار. سونداي-اق كەلىسسوزدەردى اقش-تا، «ۇلكەن جيىرمالىق» (G20) ءسامميتى كەزىندە نەمەسە ەۋروپا ەلدەرىنىڭ بىرىندە وتكىزۋ نۇسقاسى قاراستىرىلۋدا.

الايدا زەلەنسكي ازىرگە ماسكەۋ دە، ۆاشينگتون دا مۇنداي كەزدەسۋدىڭ وتەتىنىن رەسمي تۇردە راستاعان جوق ەكەنىن جەتكىزدى. ونىڭ ايتۋىنشا، ەۋروپا ەلدەرى دە وسى ماسەلەگە قاتىستى بايلانىستاردى باستادى.