رەسپۋبليكا كۇنى قارساڭىندا كوكشەتاۋ قالاسىندا «تازا قازاقستان» جالپىۇلتتىق ەكولوگيالىق باستاماسى مەن اباتتاندىرۋ ايلىعى اياسىندا جاڭا قوعامدىق كەڭىستىك – «بىرلىك» ساياباعى سالتاناتتى تۇردە اشىلدى. قالالىق جاعالاۋعا جاقىن، دوستىق ءۇيىنىڭ ماڭىندا ورنالاسقان جاسىل ايماق تۇرعىنداردىڭ سەرۋەندەپ، دەمالۋىنا ارنالعان كەڭىستىكتى كەڭەيتىپ، قالانىڭ بىرىڭعاي جاياۋ جۇرگىنشىلەر ايماعىن تولىقتىردى.
ساياباقتىڭ اشىلۋ سالتاناتىندا يگى ءداستۇردىڭ نەگىزى قالانىپ، ءوڭىردىڭ كليماتتىق جاعدايىنا بەيىمدەلگەن 80 ءتۇپ ساندىك اعاش كوشەتى مەن كوپجىلدىق ءشوپ وتىرعىزىلدى.
اقمولا وبلىسىنىڭ اكىمى مارات احمەتجانوۆ وڭىردە جۇزەگە اسىرىلىپ جاتقان كوگالداندىرۋ جۇمىستارى تۋرالى ايتىپ ءوتتى. «بيىل وڭىردە 2,8 مىڭ گەكتار اۋماققا 16 ميلليونعا جۋىق كوشەت وتىرعىزىلدى. سوڭعى بەس جىلدا 11 مىڭ گەكتار جەرگە 74 ميلليون اعاش ەگىلدى. الداعى كەزەڭدە وتىرعىزىلاتىن كوشەتتەردىڭ جالپى سانىن 150 ميلليونعا جەتكىزۋدى جوسپارلاپ وتىرمىز»، – دەدى وبلىس اكىمى.
سونداي-اق ءوڭىر باسشىسى كوكشەتاۋداعى «كوك شالعىن»، «جاڭا جاعالاۋ» جانە ششۋچينسكىدەگى «ۇماي انا» ساياباقتارى سەكىلدى جاڭا دەمالىس ايماقتارىن قۇرۋعا باعىتتالعان ماڭىزدى جوبالارعا توقتالدى. بۇگىندە بۇل ورىندار تۇرعىندار مەن ءوڭىر قوناقتارىنىڭ سۇيىكتى دەمالىس ورىندارىنا اينالىپ كەلەدى.
بۇدان بولەك، وبلىس اكىمى ەكولوگيالىق ماسەلەلەردى شەشۋ جانە قالدىقتاردى باسقارۋ ينفراقۇرىلىمىن دامىتۋ جونىندەگى جوسپارلارمەن ءبولىستى.
ء«بىرىنشى توقساندا قالدىقتاردى تەرەڭ وڭدەيتىن ءۇش زاۋىتتى ىسكە قوسۋدى جوسپارلاپ وتىرمىز. ونىڭ ءبىرى كوكشەتاۋدا جىلىنا 70 مىڭ توننا، ال زەرەندى جانە بۋراباي اۋداندارىنداعى زاۋىتتار ارقايسىسى 40 مىڭ توننا قالدىق وڭدەي الادى. بۇل كۋرورتتىق ايماقتا جينالاتىن قوقىستى تولىق وڭدەۋگە جانە كەيىن ونى حالىق شارۋاشىلىعىندا قايتا پايدالانۋعا مۇمكىندىك بەرەدى»، – دەپ اتاپ ءوتتى ءوڭىر باسشىسى.
جاڭا «بىرلىك» ساياباعى قالانىڭ جاسىل ايماقتار جۇيەسىن تولىقتىرىپ قانا قويماي، ەكولوگيالىق مادەنيەت پەن قوعامدىق كەلىسىم قۇندىلىقتارىن توعىستىرعان ماڭىزدى ورىنعا اينالدى.
قازاقستان حالىق كەڭەسىنىڭ مۇشەسى الەنا مالكوۆا-سولوپوۆا اتاپ وتكەندەي، مۇنداي قوعامدىق كەڭىستىكتەردى قالىپتاستىرۋدىڭ تاربيەلىك ءمانى زور.
«دوستىق ءۇيىنىڭ جانىندا وسىنداي ساياباقتاردىڭ اشىلۋى تۋعان ولكەنى ايالاۋ مەن ونى تازا ۇستاۋعا دەگەن ۇمتىلىسىمىزدىڭ جاسىنا دا، كاسىبىنە دە قاراماستان بارشامىزدى بىرىكتىرەتىنىن كورسەتەدى. جاستار مەن ءتۇرلى ەتنوس وكىلدەرىنىڭ بىرگە اعاش وتىرعىزۋى وسكەلەڭ ۇرپاقتىڭ بويىندا شىنايى ءپاتريوتيزمدى، تابيعاتقا دەگەن جاناشىرلىقتى جانە ورتاق ءۇيىمىزدىڭ بولاشاعىنا ارقايسىمىز جاۋاپتى ەكەنىمىزدى سەزىنۋدى قالىپتاستىرادى»، – دەدى ول.
وسىنداي يگى ەكولوگيالىق باستامالار اقمولا وبلىسىنىڭ بارلىق وڭىرىندە جالعاسۋدا. اۋداندار مەن قالالاردا سەنبىلىكتەر مەن اباتتاندىرۋ جۇمىستارى ۇيىمداستىرىلىپ، تازالىق ايلىعى اياسىندا تۋعان ولكەنىڭ كوركەيۋىنە باعىتتالعان كوپتەگەن پايدالى ءىس جۇزەگە اسىرىلۋدا.
