اقمولا وبلىسىندا 8 جانە 12 جاستاعى ەكى قىزدىڭ ءومىرىن قيعان قايعىلى وقيعا ورىن الدى، دەپ حابارلايدى "ادىرنا".
الدىن الا مالىمەتكە سايكەس، 11 شىلدە كۇنى ءبىر وتباسى تسەلينوگراد اۋدانىنداعى قىزىلجار اۋىلى ماڭىنداعى جاساندى سۋ ايدىنىنىڭ جاعاسىندا دەمالىپ، تۇنەپ قالعان.
تاڭەرتەڭ سۋعا شومىلىپ شىققاننان كەيىن اپالى-ءسىڭلىلى ەكى قىز كيىم اۋىستىرۋ ءۇشىن جاعالاۋدا تۇرعان اۆتوكولىككە وتىرعان. سول ساتتە كولىك بەلگىسىز سەبەپپەن وزدىگىنەن قوزعالىپ، ەڭىسپەن تومەن سىرعىپ، سۋعا قۇلاعان.
بالالاردىڭ اكەسى قىزدارىن قۇتقارۋعا تىرىسقانىمەن، اۆتوكولىكتىڭ ەسىگىن اشا دا، تەرەزەسىن سىندىرا دا الماعان. كولىك از ۋاقىت ىشىندە سۋ تۇبىنە كەتىپ، ەكى قىز وقيعا ورنىندا كوز جۇمعان.
قازىرگى ۋاقىتتا كولىكتىڭ وزدىگىنەن قوزعالىپ كەتۋىنە نە سەبەپ بولعانى جانە قايعىلى وقيعانىڭ باسقا دا ءمان-جايى انىقتالىپ جاتىر.
قۇقىق قورعاۋ ورگاندارى وقيعاعا قاتىستى تەرگەۋ امالدارىن جۇرگىزۋدە.
