سەنات ەلىمىزدە سانيتارلىق جانە جالپى ازىق-تۇلىك قاۋىپسىزدىگىنە جاۋاپ بەرەتىن بىرىڭعاي ورگان قۇرۋدى ۇسىندى. بۇل تۋرالى "قحا جاڭالىقتارى" اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
"ەلدەگى ەپيزووتيالىق جاعداي ءالى دە قاتتى الاڭداۋشىلىق تۋعىزۋدا. وسى جىلدىڭ قىركۇيەك ايىندا ادامدار ءسىبىر جاراسىن جۇقتىرعان. ماڭعىستاۋدا بالالار ۋلانىپ قالدى. وڭىرلەردە اسا قاۋىپتى اۋرۋلاردىڭ پايدا بولۋى كەزەڭدى تۇردە تىركەلەدى. بۇل وقيعالار حالىقتىڭ دەنساۋلىعىنا نۇقسان كەلتىرىپ قانا قويماي، قازاقستاندىق ءونىمنىڭ الەمدىك نارىقتاعى بەدەلىنە نۇقسان كەلتىرۋدە", - دەدى دەپۋتات ارمان وتەعۇلوۆ سەناتتا.
ونىڭ ايتۋىنشا، قازىرگى ۋاقىتتا قازاقستاننان باسقا ەلدەرگە، سونىڭ ىشىندە ەۋروپا ەلدەرىنە ەت جانە ەت ونىمدەرىن ەكسپورتتاۋ شەكتەلگەن. بۇل ەلىمىزدىڭ اگروونەركاسىپ كەشەنىنە ايتارلىقتاي زيان كەلتىرۋدە. دەگەنمەن، تاياۋ شىعىس پەن ازيا ەلدەرىنەن قازاقستاندىق ونىمگە سۇرانىس جوعارى بولىپ وتىر.
دەپۋتاتتار قوردالانعان ماسەلەلەردىڭ باستى سەبەپتەرىنىڭ ءبىرى مەملەكەتتىك ورگاندارداعى تيىمسىزدىك ەكەنىن كورسەتكەن جاعدايدى ساراپتادى.
"قىزمەتتەردىڭ ءبولىنۋى، جاسالعان ارەكەتتەردىڭ قايتالانۋى، مۇددەلەر قايشىلىعى ماسەلەلەردى ءتيىمدى شەشۋگە كەدەرگى كەلتىرەدى. اۋىل شارۋاشىلىعى مينيسترلىگى انىقتالعان اۋرۋلاردىڭ ءورشۋى تۋرالى حابارلاعاندا، ۆەدومستۆونى جاقسى جۇمىس ىستەمەيدى دەپ بىردەن سىنعا الادى. ۆەتەريناريالىق، فيتوسانيتارلىق جانە سانيتارلىق-ەپيدەميولوگيالىق قىزمەتتەر سياقتى ماڭىزدى قۇرىلىمدار قازىر ءارتۇرلى مەملەكەتتىك ورگانداردىڭ باقىلاۋىندا. بۇل جاعداي ءۇشىن جاۋاپكەرشىلىكتىڭ ازايۋىنا، ماسەلەلەردىڭ ءبىر ۆەدومستۆودان ەكىنشى ۆەدومستۆوعا اۋىسۋىنا الىپ كەلەدى", - دەدى وتەعۇلوۆ.
دەپۋتاتتار سانيتارلىق جانە جالپى ازىق-تۇلىك قاۋىپسىزدىگىنە جاۋاپ بەرەتىن ءبىرتۇتاس ورگان قۇرۋ جولىنا ءتۇسۋ قاجەت دەپ ەسەپتەيدى. ازەربايجاندا، وزبەكستاندا جانە قىتايدا وسىعان ۇقساس رەفورمالار وڭ ناتيجەلەرگە اكەلدى.
ۇكىمەت باسشىسىنا ۆەتەريناريا ماسەلەلەرىن جان-جاقتى قاراستىراتىن ارنايى جۇمىس توبىن قۇرۋ ۇسىنىلدى.
