وسى جىلدىڭ 15-قازانى كۇنى احمەت بايتۇرسىنۇلىنىڭ تاعىلىم مەكتەبىندە كورنەكتى عالىم، جازۋشى، دراماتۋرگ، ابايتانۋشى قايىم مۇحامەدحانۇلىنىڭ تۋعانىنا 110 جىل تولۋىنا ارنالعان تاعىلىمدى دوڭگەلەك ۇستەل ءوتتى.
جيىندى رۋحاني ءىس-شارانىڭ ۇيلەستىرۋشىسى ا.بايتۇرسىنۇلى مۋزەي-ءۇيى جەتەكشىسى، بەلگىلى احمەتتانۋشى، فيلولوگيا عىلىمدارىنىڭ كانديداتى رايحان ساحىبەكقىزى قۇتتىقتاۋ سوزبەن اشتى.
جيىنعا عالىمنىڭ قىزى، پەداگوگيكا عىلىمدارىنىڭ دوكتورى، پروفەسسور دينا قايىمقىزى مۇحامەدحان، قايىمتانۋشى زيالى قاۋىم وكىلدەرى مەن احمەت بايتۇرسىنۇلى ء«تىل – قۇرال» وقۋ-ادىستەمەلىك، عىلىمي-زەرتتەۋ ورتالىعىنان تاعىلىمدامادان ءوتۋشى ءال-فارابي اتىنداعى قازۇۋ فيلولوگيا فاكۋلتەتىنىڭ 2-كۋرس ماگيسترانتتارى، مۋزەي-ءۇيدىڭ قىزمەتكەرلەرى قاتىستى.
باسقوسۋ بارىسىندا قايىم مۇحامەدحانۇلىنىڭ ونەگەلى ءومىر جولى، الاش مۇراسىن ساقتاۋداعى ەرەن ەڭبەگى مەن عىلىمي مۇراسى كەڭىنەن ءسوز بولدى.
ءىسشارا اياسىندا ەل نازارىنا «شەجىرە سۋرەت سىر شەرتەر» اتتى تاريحي فوتوكورمە الماتى قالاسى مۋزەيلەر بىرلەستىگى تاراپىنان قور ساقتاۋ بولىمىندەگى جيناقتالعان قوردان ۇسىنىلدى.
كورمەگە قويىلعان قايىم مۇحامەدحانوۆتىڭ 60 جاسىنا سىيعا بەرىلگەن دومبىراسى مەن ءار جىلدار وقيعاسىن قامتىعان سارعايعان فوتولار جۇرتشىلىق نازارىن بىردەن باۋرادى.
جيىنعا قاتىسۋشىلار مەن «احمەتتانۋ» وقۋ ورتالىعىنان زەرتتەۋ پراكتيكادان ءوتۋشى ماگيسترانتتار تاريحي فوتوكورمەنى تاماشالاپ، قۇندى ەستەلىكتەرگە قانىقتى.
جيىننىڭ ماقساتى: الاش اماناتىنا ادالدىق پەن ۇلت رۋحانياتىنا قالتقىسىز قىزمەت ەتكەن قايىم مۇحامەدحانوۆتىڭ ۇرپاققا قالدىرعان ولمەس مۇراسى مەن تاعىلىمدى ونەگەسىن ناسيحاتتاۋ باعىتىندا ءوربىدى.
دوڭگەلەك ۇستەل ۇلتتىق عىلىمنىڭ ابىزى، الاش ارىستارىنىڭ ادال ءىزباسارى قايىم مۇحامەدحانوۆتىڭ رۋحىنا تاعزىم ەتكەن، ۇرپاقتار ساباقتاستىعىن ايشىقتاعان تاعىلىمى مول رۋحاني شارا بولدى.
جيىن سوڭىندا قاتىسۋشىلار ەستەلىك سۋرەتكە ءتۇسىپ، ءار تاراپ ءبىر-بىرلەرىنە كىتاپ سىيلادى.
ەڭلىك قوساناۆا، الماتى قالاسى مۋزەيلەر بىرلەستىگى، احمەت بايتۇرسىنۇلى مۋزەي-ءۇيىنىڭ ەكسكۋرسوۆودى
