استانادا V دۇنيەجۇزىلىك كوشپەندىلەر ويىنى اياسىندا تۇركى مەملەكەتتەرى ۇيىمىنىڭ جاستار جانە سپورت ىستەرى مينيسترلەرىنىڭ 8-ءشى وتىرىسى ءوتتى، دەپ حابارلايدى “ادىرنا” ۇلتتىق پورتالى.
ءىس-شاراعا وسى سالاعا جاۋاپتى قازاقستان، ازەربايجان، قىرعىزستان، تۇركيا، وزبەكستان، تۇركىمەنستان باسشىلارى مەن وكىلدەرى، سونداي-اق تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ جانە دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان قاتىستى.
قر مادەنيەت جانە اقپارات ۆيتسە-ءمينيسترى ەۆگەني كوچەتوۆ تمۇ ەلدەرى اراسىنداعى جاستار ساياساتى سالاسىندا ىنتىماقتاستىقتىڭ بولاشاعى زور ەكەنىن اتاپ ءوتتى.
«بۇگىنگى جاستار – ءبىزدىڭ ۇلتىمىزدىڭ بولاشاعى، بىرەگەي مادەنيەتتەردى، ءبىلىم مەن يننوۆاتسيالىق يدەيالاردى تاسىمالداۋشى. سونىمەن قاتار، جاستاردىڭ الدىندا تسيفرلاندىرۋ، كليماتتىڭ وزگەرۋى، جاھاندانۋ جانە الەۋمەتتىك تۇراقسىزدىق سياقتى جاھاندىق اۋقىمداعى سىن-قاتەرلەر تۇر. مۇنداي جاعدايدا مەملەكەتتەرىمىزدىڭ بىرلەسكەن جۇمىسى وتە ماڭىزدى»، – دەدى كوچەتوۆ.
سونىمەن قاتار، تۇركى مەملەكەتتەرىنىڭ ىنتىماقتاستىعىن نىعايتۋ ماقساتىندا جىل سايىن كەزەكپەن قازاق-تۇرىك جاستار كوپىرى ءوتىپ تۇرادى. وتكەن جىلى بۇل شارا تۇركى الەمىنىڭ بەسىگى تۇركىستاندا ءوتتى.
2025 جىلى تۇركى مەملەكەتتەرى ۇيىمىنىڭ جاستارى جاس كوشباسشىلار، جاس كاسىپكەرلەر فورۋمدارىندا، سونداي-اق تمۇ جاستار پلاتفورماسىندا كەزدەسەدى.
