كوكشەتاۋداعى «جاعالاۋ» الاڭىندا وتان قورعاۋشى كۇنىنە ارنالعان سالتاناتتى شارا ءوتىپ، وعان مىڭداعان تۇرعىن جينالدى. پاتريوتتىق رۋح پەن ۇرپاقتار ساباقتاستىعىن دارىپتەگەن مەرەكە اياسىندا كۇشتىك قۇرىلىمداردىڭ كورسەتىلىمدەرى ۇيىمداستىرىلىپ، ارداگەرلەرگە قۇرمەت كورسەتىلدى، سونداي-اق جاستار رەسپۋبليكالىق قوزعالىس قاتارىنا قابىلداندى.
سالتاناتتى جيىندى اقمولا وبلىسى اكىمىنىڭ ورىنباسارى ەلدوس رامازانوۆ اشتى. ول ءوز سوزىندە بۇل مەرەكەنىڭ تەك قارۋلى كۇشتەردىڭ قۋاتىن ايقىنداپ قانا قويماي، ەرلىك پەن وتانعا ادال قىزمەتكە نەگىزدەلگەن مەملەكەتتىك قۇندىلىقتاردىڭ ماڭىزىن كورسەتەتىنىن اتاپ ءوتتى.
– وتان قورعاۋ – ءار ازاماتتىڭ قاسيەتتى بورىشى ءارى زور مارتەبەسى. بۇگىندە ادىلەتتى قازاقستاندى قۇرۋ جولىندا اسكەري قىزمەتشى مەن كۇشتىك قۇرىلىم وكىلى كاسىبيلىك پەن ادالدىقتىڭ ۇلگىسىن كورسەتىپ كەلەدى. اقمولالىقتاردىڭ ەل قورعانىسىن نىعايتۋعا جانە ازاماتتاردىڭ قاۋىپسىزدىگىن قامتاماسىز ەتۋگە قوسىپ وتىرعان ۇلەسى زور، – دەدى ەلدوس رامازانوۆ.
ءىس-شارا اياسىندا ماراپاتتاۋ ءراسىمى ءوتتى. ءمىنسىز قىزمەتى مەن اسكەري-پاتريوتتىق تاربيەگە قوسقان ۇلەسى ءۇشىن ءوڭىردىڭ بىرقاتار وفيتسەرى مەن ارداگەرىنە ۆەدومستۆولىق مەدالدار مەن وبلىس اكىمىنىڭ العىس حاتتارى تابىستالدى.
اقمولا وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى، پولكوۆنيك قانات وماروۆ جينالعانداردى مەرەكەمەن قۇتتىقتاپ، ەل قورعانى بولۋدىڭ جاۋاپكەرشىلىگىنە توقتالدى.
– بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن. سىزگە زور دەنساۋلىق، اماندىق، اشىق اسپان تىلەيمىن. ارداگەردىڭ داڭقتى جولىن جالعاستىرىپ، ەلدىڭ ناعىز قورعاۋشىسى بولا بىلەيىك، – دەدى ول.
كەشتىڭ اسەرلى ساتتەرىنىڭ ءبىرى – جاس كوكشەتاۋلىقتىڭ انت قابىلداۋ ءراسىمى بولدى. وندا ونداعان وقۋشى «جاس ۇرپاق» بالالار-جاسوسپىرىمدەر ۇيىمىنىڭ قاتارىنا قابىلداندى.
مەرەكەلىك شارا وبلىستىق ۇكىلى ىبىراي اتىنداعى فيلارمونيا ارتىستەرىنىڭ كونتسەرتتىك باعدارلاماسىمەن قورىتىندىلاندى. «گاككۋ» ءانسامبلىنىڭ بي قويىلىمى مەن «ايناكول» فولكلورلىق ۇجىمىنىڭ ەتنو-اۋەنى انشىلەر جانات ەسوۆ، التىنبەك بەكتەمىر جانە امانعالي جۇماتاەۆتىڭ ونەرىمەن ۇيلەسىم تاپتى. شارا سوڭىندا ورىندالعان «اتامەكەن» ءانى كورەرمەننىڭ بويىندا ەلگە دەگەن ماقتانىش پەن بەيبىت بولاشاققا دەگەن سەنىم سەزىمىن كۇشەيتتى.
