26 اقپاندا اقمولا وبلىسىنىڭ ششۋچينسك قالاسىنداعى ءدامحانادا بولعان جارىلىس پەن ءورت سالدارىنان قازا تاپقاندار سانى سەگىز ادامعا جەتتى، دەپ حابارلايدى "ادىرنا" ۇلتتىق پورتالى.
دەنساۋلىق ساقتاۋ باسقارماسىنىڭ مالىمەتىنشە، اۋىر كۇيىك العان ناۋقاستاردىڭ ءبىرى “اۆيتسەننا بۋراباي” اۋرۋحاناسىندا كوز جۇمعان. دارىگەرلەر ونىڭ ءومىرىن ساقتاپ قالۋ ءۇشىن بارلىق قاجەتتى ەم-دوم شارالارىن جۇرگىزگەنىمەن، ناۋقاستىڭ جاعدايى تىم اۋىر بولعان.
قازىرگى ۋاقىتتا وقيعا سالدارىنان زارداپ شەككەندەر وڭىردەگى مەديتسينالىق مەكەمەلەردە ەم قابىلداپ جاتىر. ءتورت ادام كوكشەتاۋداعى اقمولا وبلىستىق كوپسالالى اۋرۋحاناسىنا جەتكىزىلگەن. دارىگەرلەر ولاردىڭ ۇشەۋىنىڭ جاعدايىن اۋىر، بىراق تۇراقتى دەپ باعالاپ وتىر. ماماندار ازىرگە ولاردى باسقا قالاعا تاسىمالداۋ مۇمكىن ەمەس ەكەنىن ايتادى. تاعى ءبىر ناۋقاستىڭ دەنەسىنىڭ 85 پايىزى كۇيىپ، جاعدايى اسا اۋىر كۇيدە قالىپ وتىر.
اقمولا وبلىستىق دەنساۋلىق ساقتاۋ باسقارماسىنىڭ باسشىسى ناريمان ەرمەكتىڭ ايتۋىنشا، زارداپ شەككەندەردىڭ ءبىر بولىگى سانيتارلىق اۆياتسيا ارقىلى جەتكىزىلسە، تاعى ءبىر ناۋقاس رەانيموبيلمەن تاسىمالدانعان. قازىرگى تاڭدا اۋىر حالدەگى پاتسيەنتتەر جاساندى تىنىس الۋ اپپاراتىنا قوسىلعان. ولاردىڭ جاعدايى كۇن سايىن دارىگەرلەر كونسيليۋمى ارقىلى باقىلاۋدا. ەمدەۋ بارىسىندا زاماناۋي تەراپيا ادىستەرى قولدانىلىپ، استاناداعى شۇعىل مەديتسينا ورتالىعىمەن تۇراقتى بايلانىس ورناتىلعان.
