قازاقستان ازاماتى نۇرلان قوناقباەۆ قىرعىزستاننىڭ مەملەكەتتىك تسيركىنىڭ ديرەكتورى بولىپ تاعايىندالدى. ءتيىستى شەشىمدى قىرعىزستان پرەزيدەنتى سادىر جاپاروۆ قابىلدادى، دەپ حابارلايدى "ادىرنا".
24.kg باسىلىمىنىڭ مالىمەتىنشە، مەملەكەت باسشىسى جاڭا ديرەكتوردى قابىلداپ، تسيرك ۇجىمىنداعى ماسەلەلەردى شەشۋدى تاپسىرعان. پرەزيدەنتتىڭ ايتۋىنشا، سىرتتان باسشى شاقىرۋعا ارتىستەر مەن اكىمشىلىك اراسىنداعى ۇزاققا سوزىلعان جانجالدار سەبەپ بولعان.
2023 جىلى سادىر جاپاروۆ تسيرك عيماراتىن كۇردەلى جوندەۋدەن وتكىزۋ تۋرالى تاپسىرما بەرگەن. عيمارات جاڭارتىلىپ، ونەر كورسەتۋگە ارنالعان جاعداي جاقسارعانىمەن، ۇجىم ىشىندەگى كەلىسپەۋشىلىكتەر جالعاسقان. ەندى جاڭا باسشىنىڭ الدىندا ەڭبەك ءتارتىبىن رەتتەۋ، ۇجىمداعى قالىپتى احۋالدى قالپىنا كەلتىرۋ جانە قويىلىمدار باعدارلاماسىن كەڭەيتۋ مىندەتى تۇر. سونىمەن قاتار قىرعىزستانعا شەتەلدىك تسيرك ۇجىمدارىن تارتۋ جوسپارلانىپ وتىر.
بۇعان دەيىن تسيركتى سۆەتلانا اشيروۆا باسقارعان. ول بۇل قىزمەتكە 2024 جىلدىڭ كۇزىندە تاعايىندالعان. الايدا بىرنەشە ايدان كەيىن قىزمەتكەرلەر تاراپىنان سىنعا ۇشىرادى. ارتىستەر ونى قىسىم كورسەتتى، باسقارۋ ىسىندە بىلىكسىزدىك تانىتتى جانە ۇجىمنىڭ ىدىراۋىنا سەبەپ بولدى دەپ ايىپتاعان. اشيروۆا بۇل ايىپتاۋلاردى جوققا شىعارعان.
2025 جىلدىڭ قاڭتارىندا ول قىزمەتىنەن بوساتىلىپ، بىرنەشە كۇننەن كەيىن قايتا تاعايىندالعان. ال 2026 جىلدىڭ تامىزىندا تسيرك قىزمەتكەرلەرى پرەزيدەنتتەن كومەك سۇراعان. ولاردىڭ مالىمەتىنشە، مەكەمەدە جۇمىس ىستەگەن 186 ادامنىڭ جۇزدەن استامى تسيركتەن كەتكەن. اشيروۆا كەيبىر لاۋازىمداردىڭ باستاپقىدان بوس بولعانىن، ال بىرقاتار ءارتىستىڭ جالاقىنىڭ تومەندىگىنە بايلانىستى جۇمىستان شىققانىن ايتقان.
نۇرلان قوناقباەۆ 41 جاستا. ول قىرعىزستاندا دۇنيەگە كەلگەنىمەن، كاسىبي مانسابىن قازاقستاندا قالىپتاستىرعان. اباي اتىنداعى قازاق ۇلتتىق وپەرا جانە بالەت تەاترىندا بالەت ءسوليسى بولىپ جۇمىس ىستەگەن. كەيىن حالىقارالىق گاسترولدەر مەن مادەني جوبالاردى ۇيىمداستىرۋمەن اينالىسقان.
2024 جىلدىڭ جەلتوقسانىندا قوناقباەۆ Almaty Theatre تەاترىنىڭ باسشىسى بولىپ تاعايىندالعان. سونىمەن قاتار ول قازاقستان مەن اقش-تا گاسترولدەر، بالەت قويىلىمدارى جانە شەتەلدىك ارتىستەردىڭ ونەر كورسەتۋىن ۇيىمداستىراتىن ەكى كومپانيا قۇرعان.
