بولگاريا پرەمەر-ءمينيسترى روسەن جەليازكوۆتىڭ جەتەكشىلىگىندەگى وڭ-ورتالىق ۇكىمەت جاپپاي قوعامدىق قىسىمنان كەيىن وتستاۆكاعا كەتتى. بۇل شەشىم سارسەنبى كەشىندە ەل استاناسى سوفيادا جانە باسقا دا قالالاردا وتكەن كەڭ كولەمدى نارازىلىقتاردان سوڭ جاريالاندى، دەپ حابارلايدى “ادىرنا” پورتالى ۆۆس-گە سىلتەپ.
سوفيانىڭ ورتالىعىنداعى تاۋەلسىزدىك الاڭىنا، «بيلىك ءۇشبۇرىشى» دەپ اتالاتىن ايماققا 50 000–100 000-عا جۋىق ادام جينالىپ، ۇكىمەتتىڭ قىزمەتتەن كەتۋىن تالاپ ەتتى. نارازىلىق بارىسىندا پارلامەنت عيماراتىنا «وتستاۆكا» جانە «مافيا، كەت!» دەگەن جازۋلار پروەكتسيالاندى.
وتكەن اپتادا شەرۋشىلەردى بولگاريا پرەزيدەنتى رۋمەن رادەۆ تە قولداپ، ۇكىمەتكە وتستاۆكاعا كەتۋ جونىندە اشىق ۇندەۋ جاساعان بولاتىن.
روسەن جەليازكوۆ سەنىمسىزدىك ۆوتۋمىنا داۋىس بەرۋدىڭ الدىندا جانە بولگاريانىڭ ەۋروايماققا قوسىلۋىنا 20 كۇن قالعاندا پرەمەر-مينيستر قىزمەتىن تاستادى. جينالعاندار ۇكىمەتتى قاڭتار ايىنان بەرى جالعاسىپ كەلە جاتقان كەڭ تارالعان سىبايلاس جەمقورلىققا قاتىسى بار دەپ ايىپتادى. وسى سىنداردان كەيىن بيلىك كەلەسى جىلعا ارنالعان داۋلى بيۋدجەت جوباسىن قايتارىپ العان ەدى.
تەلەجولداۋىندا جەليازكوۆ نارازىلىق بىلدىرۋشىلەردىڭ تالابىن ەستيتىنىن مالىمدەپ، جاستار مەن ەگدە ادامداردىڭ دا وتستاۆكا تالاپ ەتكەنىن اتاپ ءوتتى. ول ازاماتتىق بەلسەندىلىكتى قولداۋ قاجەتتىگىن ايتتى.
ۇكىمەتتىڭ سايتىندا جاريالانعان رەسمي اقپاراتقا سايكەس، قازىرگى مينيسترلەر جاڭا كابينەت جاساقتالعانشا ءوز مىندەتتەرىن اتقارا بەرەدى.
جەليازكوۆتىڭ ۇكىمەتى بۇعان دەيىن بەس رەت سەنىمسىزدىك ۆوتۋمىنان وتكەن، ال بەيسەنبى كۇنى التىنشىسى وتكىزىلمەك بولعان.
