اقش پرەزيدەنتى دونالد ترامپ رەسپۋبليكالىق پارتيا مۇشەلەرى مەن ولاردىڭ جاقتاستارىنا دەموكراتتار تاراپىنان جاسالعانى ايتىلعان قوقان-لوققىلاردى تەكسەرۋدى ادىلەت مينيسترلىگىنە تاپسىردى. بۇل تۋرالى ول Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا".
ترامپتىڭ سوزىنشە، دەموكراتيالىق پارتيا وكىلدەرى اقش-تىڭ باس پروكۋرورى مەن باسقا دا جوعارى لاۋازىمدى تۇلعالارعا قىسىم كورسەتىپ، ولاردى يمپيچمەنت جاريالاۋمەن جانە ءتۇرلى جازالاۋ شارالارىمەن قورقىتقان.
سونداي-اق اقش پرەزيدەنتى دەموكراتتار رەسپۋبليكالىق پارتيانىڭ قارجىلىق دەمەۋشىلەرىن قىلمىستىق جاۋاپكەرشىلىككە تارتامىز جانە تۇرمەگە جابامىز دەپ سەس كورسەتكەنىن العا تارتتى.
«بۇل – ەڭ جوعارى دەڭگەيدەگى بوپسالاۋ. مۇنداي ارەكەتتەر ءۇشىن جاۋاپكەرشىلىككە تارتۋ قاجەت»، – دەپ جازدى ترامپ.
بۇدان بولەك، اق ءۇي باسشىسى ميچيگان شتاتىنان سايلانعان سەناتور ەليسسا سلوتكيندى دە سىنعا الدى. ونىڭ ايتۋىنشا، سەناتور رەسپۋبليكالىق كوزقاراستى ۇستاناتىن جاستارعا قارسى ارەكەت ەتۋدى كوزدەپ وتىر.
ترامپتىڭ مالىمدەۋىنشە، دەموكراتتار ەشقانداي زاڭ بۇزۋشىلىق جاساماعان ادامدارعا دا قورقىتۋ سيپاتىنداعى حاتتار جولداعان.
«وسى مالىمدەمە ارقىلى ادىلەت مينيسترلىگىنە اتالعان ىقتيمال قىلمىستىق ارەكەتتەردى دەرەۋ تەرگەۋدى تاپسىرامىن»، – دەدى اقش پرەزيدەنتى.
الايدا ترامپ ءوز جازباسىندا ايتىلعان ايىپتاۋلاردى راستايتىن ناقتى دالەلدەر ۇسىنباعان. سونداي-اق ازىرگە وسى مالىمدەمەگە بايلانىستى رەسمي تەرگەۋدىڭ باستالعانى جونىندە اقپارات جاريالانعان جوق.
ايتا كەتەيىك، ترامپتىڭ بۇل مالىمدەمەسى اقش-تاعى ارالىق سايلاۋدان كەيىن ساياسي كۇشتەردىڭ اراقاتىناسى وزگەرگەن كەزەڭدە جاسالدى. 3 قاراشادا وتكەن سايلاۋ قورىتىندىسى بويىنشا دەموكراتيالىق پارتيا كونگرەستىڭ وكىلدەر پالاتاسى مەن سەناتىندا باسىمدىققا يە بولعانى حابارلانعان ەدى.
كونگرەستىڭ جاڭادان سايلانعان قۇرامى 2027 جىلدىڭ قاڭتارىندا ءوز جۇمىسىنا كىرىسەدى.
