Suret Jİ kömegımen jasaldy
AQŞ prezidentı Donald Tramp 2026 jylǧy Nobel beibıtşılık syilyǧynyŋ oŋtüstıkafrikalyq zaŋger Navanethem (Navi) Pilleige berıluıne qatysty pıkır bıldırdı, dep habarlaidy "Adyrna" tılşısı.
Ol Truth Social äleumettık jelısındegı jazbasynda beibıtşılık ornatu jolyndaǧy eŋbegı üşın būl marapatqa özın laiyq sanaitynyn jazǧan. Tramptyŋ aituynşa, ol syilyqtyŋ jaŋa iegerı turaly jäne onyŋ qandai eŋbegı üşın marapattalǧanynan habarsyz. Al özı segız soǧysty toqtatqanyn aityp, bır emes, segız Nobel beibıtşılık syilyǧyna laiyq ekenın jetkızdı.
AQŞ prezidentı soǧystardy retteuge üles qostym degen elder men taraptardy atap öttı. Olardyŋ qatarynda Kambodja men Tailand, Kosovo men Serbiia, Kongo Demokratiialyq Respublikasy men Ruanda, Päkıstan men Ündıstan, İzrail men İran, Mysyr men Efiopiia, Armeniia men Äzerbaijan, sondai-aq İzrail men HAMAS bar.
Tramp İrannyŋ iadrolyq qaru jasauyna jol bermegenın jäne köptegen adamnyŋ ömırın saqtap qalǧanyn da atap öttı. Sonymen qatar Venesueladaǧy saiasi jaǧdaiǧa aralasuyn, Korei tübegı men basqa da aimaqtardaǧy qaqtyǧystardyŋ aldyn aluǧa qosqan ülesın öz jetıstıkterınıŋ qataryna qosty.
AQŞ prezidentı Nobel beibıtşılık syilyǧynyŋ özıne berılmegenıne narazylyq bıldırıp, Bırıkken Ūlttar Ūiymynyŋ qaqtyǧystardy retteudegı rölın synǧa aldy. Onyŋ pıkırınşe, özı atqarǧan jūmystarǧa qaramastan, marapattyŋ basqa adamǧa berıluı Nobel syilyǧynyŋ bedelıne nūqsan keltıredı.
Būǧan deiın 2026 jylǧy Nobel beibıtşılık syilyǧy adam qūqyqtaryn qorǧau jäne halyqaralyq qūqyqty damytu salasyndaǧy eŋbegı üşın oŋtüstıkafrikalyq zaŋger Navi Pilleige berılgenı habarlanǧan edı. Ol äskeri qylmystar, adamzatqa qarsy qylmystar men genosidke qatysty sot prosesterıne qatysqan.
