Memleket basşysynyŋ ökımımen Saiat İsanov Qazaqstan Qaruly Küşterı Arnaiy operasiialar küşterınıŋ qolbasşysy qyzmetıne taǧaiyndaldy, dep habarlaidy "Adyrna" tılşısı.
Būl turaly Aqorda habarlady.
Saiat İsanov būǧan deiın Qazaqstan Respublikasy Qaruly Küşterı Arnaiy operasiialar küşterı qolbasşysynyŋ orynbasary, podpolkovnik qyzmetın atqarǧan. Sonymen qatar, BAQ-ta onyŋ 2025 jyly respublikalyq jarystardy ūiymdastyruǧa jäne olarǧa bas töreşılık etuge qatysqany turaly aqparat bar.
Arnaiy operasiialar küşterınıŋ qolbasşylyǧy 2022 jylǧy qaŋtarda Prezident jarlyǧymen qūrylǧan. Onyŋ negızgı mındetterı – eldıŋ qorǧanys qabıletı men äskeri qauıpsızdıgın qamtamasyz etu, terrorizmge qarsy operasiialarǧa qatysu jäne zaŋsyz qaruly qūrylymdarǧa qarsy ıs-qimyl jasau.
2024 jylǧy qaŋtardan 2026 jylǧy qazanǧa deiın būl qūrylymdy Aidos Myrzahmetov basqardy. 27 qyrküiekte ol Qazaqstannyŋ qorǧanys ministrı bolyp taǧaiyndaldy. Ol būl qyzmette Däuren Qosanovtyŋ ornyna keldı.
Qorǧanys salasynda qyrküiek soŋynda bolǧan qaiǧyly oqiǧadan soŋ bırqatar kadrlyq özgerıs boldy. 3 qazan künı Prezident Qasym-Jomart Toqaev qorǧanys ministrınıŋ bırınşı orynbasary – Qaruly Küşter Bas ştabynyŋ bastyǧy Qanyş Äbubäkırovtı, qorǧanys ministrınıŋ orynbasary Almaz Jūmakeevtı jäne äskeri-teŋız küşterınıŋ bas qolbasşysy Qanat Niiazbekovtı qyzmetterınen bosatty.
Keiın Qanat Niiazbekov Kaspii teŋızındegı oqu-jattyǧu kezınde äskeri qyzmetşılerdıŋ qaza tabuyna qatysty qylmystyq ıs aiasynda ūstalyp, uaqytşa ūstau izoliatoryna qamaldy. Būǧan deiın onyŋ bırınşı orynbasary da tergeuge alynǧan.
Būdan bölek, Prezident tapsyrmasymen qorǧanys ministrlıgınıŋ qyzmetın tekseru jönındegı komissiia qūrylǧan. Tekserudıŋ alǧaşqy kezeŋınde memlekettık mülıktı jymqyruy mümkın degen küdık, qyzmettık ökılettıktı terıs paidalanu jäne basqa da zaŋbūzuşylyqtar boiynşa 13 qylmystyq ıs qozǧalǧan.
