شىمكەنتتە كوشە تازالاۋعا جاۋاپتى كوممۋنالدىق مەكەمەنىڭ كولىك جۇرگىزۋشىلەرى جاپپاي جۇمىسقا شىقپاي قويدى، دەپ حابارلايدى «ادىرنا» ءتىلشىسى كتك-عا سىلتەمە جاساپ.
بۇل شەشىمگە مەكەمە ديرەكتورىنىڭ جۇمىسشىلاردى كۇندىز-ءتۇنى جۇمىس ىستەتكەنىمەن، قوسىمشا ايلىق بەرمەيتىنى سەبەپ بولعان. قىزمەتكەرلەر كولىكتەردىڭ دە ماي-سۋىن ءوز قالتاسىنان اۋىستىرىپ، قوسىمشا بولشەكتەردى دە ءوز قارجىلارىنا الاتىنىن جەتكىزدى. وسىعان كەلىسپەگەن 100-دەن استام جۇمىسشىنى «ەڭبەكشى» دەپ اتالاتىن كومۋنالدىق مەملەكەتتىك مەكەمەنىڭ ديرەكتورى بۇگىن، اۋىزشا، جاپپاي جۇمىستان قۋعان.
«جۇمىس ۋاقىتى 9-دان 6-عا دەيىن دەپ بەكىتىلگەن. بىراق ءبىر كۇندەرى ساعات 9-دا، 10-دا، 11-دە، كەيدە تۇنگى 2-دە دە قايتقانمىن. تاڭعى 4-كە دەيىن ىستەگەندەر بار، سەنبىدە كەتكەنىمىزگە جۇمىستان شىعارىپ جاتىر. اقى تولەنبەيدى، جەكسەنبى كۇنى دە جۇمىسقا شىعارتادى. «شىقپايمىن» دەسەڭ بولدى، «بوسسىڭ» دەيدى. بۇل كىسىنىڭ جۇمىسى — جۇمىستان شىعارۋ»،-دەيدى جۇرگىزۋشىلەردىڭ ءبىرى.
بىلتىر قاراشادا قۇرىلىپ، جۇمىس ىستەپ جاتقان كوممۋنالدىق مەكەمەنىڭ ديرەكتورى قول استىنداعىلاردىڭ شاعىمىنىڭ بىرەۋىمەن دە كەلىسپەيتىنىن ايتتى.
ء«وز قالتامىزدان الامىز دەگەنى وتىرىك. ەشكىم الىڭدار ماجبۇرلەپ جاتقان جوق. التى كۇندىك جۇمىس كۇنىنە ءوتىپ جاتىرمىز. بۇل جەردە ءبولىم باسشىسى دۇرىس جەتكىزبەگەن دەپ ويلايمىن»،-دەدى نۇرجان تولەبەكوۆ.
شۋلاعان جۇمىسشىلار قالا باسشىسىن شاقىرعان. قالا اكىمىنىڭ ورنىنا اۋدان اكىمىنىڭ ورىنباسارى كەلگەن. بىراق جاۋاپتى شەنەۋنىكتىڭ جۇمىسشىلارمەن اڭگىمەسى جاراسپادى. جۇمىسقا شىقپادىڭدار دەگەن باپپەن جۇمىستان بوساتامىز دەگەن سوڭ جۇرگىزۋشىلەردىڭ ءبىرازى كولىككە قايتا وتىرۋىنا تۋرا كەلدى. بىراق 180 جۇرگىزۋشى ماسەلەگە قالا اكىمى ارالاسىپ، جۇگەنسىز باسشىنىڭ ارەكەتىنە پروكۋرورلار مەن ەڭبەك ينسپەكتسياسى ارالاسقانىن قالايدى.
