2026 جىلى 12 قازاننان 1 قاراشاعا دەيىن الماتى تۇرعىندارى «حالىق قاتىساتىن بيۋدجەت» جوباسى اياسىندا جوبالىق ۇسىنىسىن بەرە الادى. ىرىكتەۋدەن ءوتىپ، داۋىس بەرۋ قورىتىندىسى بويىنشا تۇرعىنداردىڭ قولداۋىنا يە بولعان باستامالاردى اۋدان اكىمدىكتەرى 2027 جىلى جۇزەگە اسىرۋدى جوسپارلاپ وتىر.
جوبا قالا تۇرعىندارىنا كوركەيتۋ جانە قالالىق ورتانى دامىتۋ جونىندە يدەياسىن ۇسىنۋعا، كەيىن ەڭ قاجەتتى باستامالاردى تاڭداۋعا قاتىسۋعا مۇمكىندىك بەرەدى.
ءوتىنىم budget.open-almaty.kz پورتالى ارقىلى ەلەكتروندى فورماتتا قابىلدانادى. قاتىسۋ ءۇشىن جوبانىڭ اتاۋى مەن سيپاتتاماسىن، ىسكە اسىرۋ جوسپارلانعان مەكەنجايدى كورسەتۋ، سونداي-اق ەسكيز بەن الدىن الا سمەتانى قوسا بەرۋ قاجەت. بۇل كەزەڭدە تولىققاندى جوبالاۋ-سمەتالىق قۇجاتتاما ازىرلەۋ تالاپ ەتىلمەيدى.
ءبىر جوبانىڭ قۇنى 324,3 ملن تەڭگەدەن اسپاۋعا ءتيىس. باستاما جالپىعا ورتاق پايدالانۋعا باعىتتالۋى، اۋداننىڭ قاجەتتىلىگىنە ساي كەلۋى، اۋدان اكىمدىگىنىڭ قۇزىرەتىنە كىرۋى جانە جەكە كوممەرتسيالىق سيپاتتا بولماۋى كەرەك.
تۇرعىندار كوگالداندىرۋ، تروتۋارلاردى، پاندۋستار مەن ارىقتاردى سالۋ جانە جوندەۋ، ساياباقتاردى، سكۆەرلەر مەن جۇرگىنشى ايماقتارىن كوركەيتۋ، قالالىق ينفراقۇرىلىم قۇرىلىمدارىن جوندەۋ، زاڭسىز قوقىس ورىندارىن جويۋ، ورىندىقتار، قوقىس جاشىكتەرى مەن كۇركە ورناتۋ، سونداي-اق بالالار جانە سپورت الاڭىن سالۋ مەن جوندەۋ جانە كوركەيتۋگە قاتىستى وزگە دە باعىتتار بويىنشا جوبالار ۇسىنا الادى.
ءوتىنىم قابىلداۋ اياقتالعاننان كەيىن جوبالىق ۇسىنىستاردى اۋدانداردىڭ ساراپتامالىق كەڭەسى قارايدى. باستامانىڭ ماڭىزى، ونى ىسكە اسىرۋ مۇمكىندىگى، بەلگىلەنگەن باعىتتارعا سايكەستىگى جانە بۇرىن جۇزەگە اسىرىلعان جوبالاردى قايتالاماۋى ەسكەرىلەدى.
قاراۋ قورىتىندىسى بويىنشا وتىنىمگە ءۇش مارتەبەنىڭ ءبىرى بەرىلەدى: «داۋىس بەرۋگە جىبەرىلدى»، «پىسىقتاۋعا جىبەرىلدى» نەمەسە «قابىلدانبادى». پىسىقتاۋعا جىبەرىلگەن جوبالاردىڭ اۆتورلارى وزگەرىس ەنگىزىپ، ولاردى قايتا قاراۋعا ۇسىنا الادى.
داۋىس بەرۋ دە budget.open-almaty.kz پورتالىندا ەلەكتروندى فورماتتا وتەدى. ونىڭ قورىتىندىسى بويىنشا قاراستىرىلعان قارجىلاندىرۋ كولەمى شەگىندە ىسكە اسىرىلاتىن جوبالار انىقتالادى.
قوسىمشا اقپاراتتى الماتىنىڭ اۋدان اكىمدىكتەرىنەن جانە 224-39-29, ىشكى 203 ءنومىرى ارقىلى «Open Almaty» قوعامدىق قابىلداۋ بولمەسىنەن الۋعا بولادى.
