فوتو: mogilew.by
الماتىدا سۋمەن جابدىقتاۋ جانە كارىز قىزمەتتەرى ءۇشىن تولەنبەگەن بەرەشەك كولەمى 550 ملن تەڭگەدەن اسىپ وتىر. بۇل تۋرالى «الماتى سۋ» كاسىپورنى مالىمدەدى، دەپ حابارلايدى "ادىرنا".
كاسىپورىن وكىلدەرى كوممۋنالدىق تولەمدەردى ۋاقىتىندا تولەمەۋ قوسىمشا ءوسىمپۇلدىڭ ەسەپتەلۋىنە، سۋ بەرۋدىڭ شەكتەلۋىنە جانە قارىزدى سوت ارقىلى ءوندىرىپ الۋعا اكەلۋى مۇمكىن ەكەنىن ەسكەرتتى.
مالىمەتكە سايكەس، بەرەشەكتىڭ شامامەن 250 ملن تەڭگەسى كوپقاباتتى تۇرعىن ۇيلەردە تۇراتىن ازاماتتارعا تيەسىلى. ال جەكە سەكتورداعى ۇيلەردىڭ يەلەرى 300 ملن تەڭگەدەن استام قارىز جيناعان.
«الماتى سۋ» تۇتىنۋشىلارعا سۋ مەن كارىز قىزمەتتەرى ءۇشىن تولەمدى ءار ايدىڭ 25-ىنە دەيىن جۇرگىزۋ قاجەتتىگىن ەسكە سالدى. ەگەر تولەم بەلگىلەنگەن مەرزىمدە جاسالماسا، 26-سىنان باستاپ ءوسىمپۇل ەسەپتەلە باستايدى.
بەرەشەك ۇزاق ۋاقىت وتەلمەگەن جاعدايدا، كاسىپورىن قولدانىستاعى تارتىپكە سايكەس سۋ بەرۋدى ۋاقىتشا شەكتەۋگە نەمەسە توقتاتۋعا، سونداي-اق قارىزدى سوت تارتىبىمەن ءوندىرىپ الۋعا قۇقىلى. مۇنداي جاعدايدا تۇتىنۋشى نەگىزگى بەرەشەكتەن بولەك، ەسەپتەلگەن ءوسىمپۇل مەن سوت شىعىندارىن دا تولەۋى مۇمكىن.
سونىمەن قاتار سۋ بەرۋدى شەكتەۋ نەمەسە توقتاتۋ شارالارى قولدانىلعانعا دەيىن تۇتىنۋشىعا كەمىندە ءۇش كۇن بۇرىن ەسكەرتۋ جاسالۋى ءتيىس.
«الماتى سۋ» ماماندارى تۇرعىندارعا كوممۋنالدىق قىزمەتتەر بويىنشا تۇبىرتەكتەردى تۇراقتى تەكسەرىپ، تولەمدەردى بەلگىلەنگەن مەرزىمدە وتەۋگە كەڭەس بەرەدى. بۇل قارىزدىڭ جينالۋىنا جانە قوسىمشا شىعىنداردىڭ تۋىنداۋىنا جول بەرمەۋگە كومەكتەسەدى.
ال تولەنبەگەن بەرەشەگى بار ازاماتتارعا قارىز سوماسىن ناقتىلاپ، تولەمدى مۇمكىندىگىنشە كەشىكتىرمەي جاساۋ ۇسىنىلادى.
