قىرعىزستاندا «سوتسيال-دەموكراتتار ءىسى» بويىنشا ۇكىم شىقتى. ەلدىڭ بۇرىنعى پرەزيدەنتى المازبەك اتامباەۆتىڭ 33 جاستاعى ۇلى قادىربەك اتامباەۆ 4 جىلعا باس بوستاندىعىنان ايىرىلدى، دەپ حابارلايدى «ادىرنا» ءتىلشىسى Kaktus.media-عا سىلتەمە جاساپ.
باسىلىم مالىمەتىنشە، 2025 جىلدىڭ قاراشا ايىنىڭ سوڭىندا جاپپاي تارتىپسىزدىك ۇيىمداستىرۋعا دايىندالدى دەگەن كۇدىكپەن «سوتسيال-دەموكراتتار» پارتياسىنىڭ وكىلدەرى ۇستالعان. سول كەزدە قىرعىزستان ءىىم ون ادامنىڭ قاماۋعا الىنعانىن حابارلاعان ەدى. تەرگەۋ نۇسقاسىنا سايكەس، ولار جوگوركۋ كەڭەش دەپۋتاتتارىنىڭ كەزەكتەن تىس سايلاۋىنان كەيىن جاپپاي نارازىلىق اكتسيالارىن وتكىزۋدى جوسپارلاعان.
ۇستالعانداردىڭ قاتارىندا بۇرىنعى پرەزيدەنت المازبەك اتامباەۆتىڭ ۇلى قادىربەك اتامباەۆ، ساياساتكەرلەر تەمىرلان سۇلتانبەكوۆ پەن ەرمەك ەرماتوۆ، جوگوركۋ كەڭەستىڭ بۇرىنعى دەپۋتاتتارى قۋبانىچبەك قادىروۆ پەن شايلووبەك اتازوۆ، كاسىپكەر ۋرمات بارىقتاباسوۆ، اتامباەۆتىڭ بۇرىنعى وققاعارى دامير مۋساكەەۆ جانە باسقا دا تۇلعالار بولعان.
بۇگىن، 8 قازاندا بىشكەكتە بۇل ءىس بويىنشا جابىق رەجيمدە سوت ۇكىمى جاريالانعان. سۋديا كەڭەسۋ بولمەسىنەن ورالعاننان كەيىن ايىپتاۋ ۇكىمىن شىعارعان. اتاپ ايتساق، تەمىرلان سۇلتانبەكوۆ 7 جىلعا، قادىربەك اتامباەۆ 4 جىلعا سوتتالدى. ال ابدۋكارىم ءابدىراحمانوۆ 8 جىلعا باس بوستاندىعىنان ايىرىلدى. ول بۇعان دەيىن دە ءالامۇدۇن اۋداندىق سوتىنىڭ شەشىمىمەن الاياقتىق ءىسى بويىنشا سوتتالعان بولاتىن.
ال ەرمەك ەرماتوۆقا قاتىستى ايىپ بابى جەڭىلدەتىلىپ، پروباتسيالىق باقىلاۋ قولدانىلدى. ول سوت زالىنان بوساتىلدى. قۋبانىچبەك قادىروۆ تولىق اقتالدى.
سونداي-اق قازاقستان ازاماتى سەرىكباي قابىلانبەك سوت زالىنان بوساتىلدى. ول جازاسىن وتەپ بولعاندىقتان، كەيىننەن قىرعىزستان اۋماعىنان شىعارىلاتىن بولدى.
ەسكە سالايىق، 2025 جىلدىڭ قاراشاسىندا قىرعىزستان ءىىم جوگوركۋ كەڭەش سايلاۋىنان كەيىن جاپپاي تارتىپسىزدىك ۇيىمداستىرۋدى كوزدەگەن دەسترۋكتيۆتى توپ مۇشەلەرىنىڭ ۇستالعانىن حابارلاعان ەدى. تەرگەۋ دەرەگىنە سايكەس، توپ قۇرامىندا ساياساتكەرلەر، بۇرىنعى دەپۋتاتتار، ەكس-مەملەكەتتىك قىزمەتكەرلەر مەن كۇشتىك قۇرىلىمداردىڭ بۇرىنعى قىزمەتكەرلەرى بولعان. ولار جاقتاستارىن، ونىڭ ىشىندە ۇيىمداسقان قىلمىستىق توپتار مەن سپورتتىق قاۋىمداستىق وكىلدەرىن تارتىپ، ارانداتۋ ارەكەتتەرى مەن كۇش قولدانۋ ارقىلى قاقتىعىستار ۇيىمداستىرۋدى كوزدەگەن.
ال قادىربەك اتامباەۆتىڭ ءوزى بۇعان دەيىن وزىنە تاعىلعان ايىپتىڭ اۋىرلاتىلعانىن ايتىپ، وعان بيلىكتى كۇشپەن باسىپ الۋعا ارەكەت جاساۋ بابى بويىنشا ايىپ تاعىلعانىن مالىمدەگەن.
