وڭتۇستىك كورەيانىڭ پحيونتحەك قالاسىندا بولعان جاپپاي توبەلەسكە قازاقستاندىقتاردىڭ قاتىسۋى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
قازاقستان سىرتقى ىستەر مينيسترلىگى وقيعاعا قاتىستى پىكىر ءبىلدىردى.
Yonhap اگەنتتىگىنىڭ حابارلاۋىنشا، جانجال 3 قازان كەشكە تۇرعىن ءۇي اۋماعىندا، بالاباقشا مەن باستاۋىش مەكتەپكە جاقىن جەردە بولعان. وقيعاعا ورتالىق ازيا ەلدەرىنىڭ ازاماتتارى قاتىسۋى مۇمكىن دەگەن بولجام ايتىلعان.
وقيعا ورنىندا 20 جاستاعى ەكى ەر ادام ۇستالعان. قالعان قاتىسۋشىلاردى پوليتسيا ىزدەستىرىپ جاتىر. تەرگەۋ بارىسىندا اعاش تاياقتار مەن بەيسبول تاياقتارى تابىلعان.
وڭتۇستىك كورەيالىق پوليتسيانىڭ مالىمەتىنشە، بەينەباقىلاۋ جازبالارىندا توبەلەسكە شامامەن 15 ادامنىڭ قاتىسقانى كورىنەدى. ال كۋاگەرلەر وقيعاعا 40-قا جۋىق ادام ارالاسقانىن ايتقان. الدىن الا بولجام بويىنشا، جانجال قازاقستان مەن قىرعىزستان ازاماتتارى بولۋى مۇمكىن توپتار اراسىنداعى كەلىسپەۋشىلىكتەن باستالعان. وقيعاعا قاتىستى ۆيدەولار الەۋمەتتىك جەلىلەردە دە تاراعان.
قازاقستان ءسىم-ءنىڭ مالىمەتىنشە، قازىرگى ۋاقىتتا انىقتالىپ، ۇستالعان ادامداردىڭ اراسىندا قازاقستان ازاماتتارى جوق.
«الدىن الا اقپارات بويىنشا، پحيونتحەك قالاسىنداعى جاپپاي توبەلەسكە قاتىسى بار انىقتالعان جانە قازىرگى ۋاقىتتا ۇستالعان ادامداردىڭ اراسىندا قازاقستان ازاماتتارى جوق»، — دەپ حابارلادى ۆەدومستۆو.
