قازاقستان پرەزيدەنتى قاسىم-جومارت توقاەۆقا وزبەكستان باسشىسى شاۆكات ميرزيوەۆتىڭ قولىنان «ولي داراجالي دۋستليك» («جوعارى دارەجەلى دوستىق») وردەنى تابىس ەتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
مەملەكەت باسشىسى ماراپاتتى جەكە وزىنە ەمەس، تۇتاس قازاقستان حالقىنا كورسەتىلگەن قۇرمەتتىڭ بەلگىسى رەتىندە قابىل العانىن اتاپ ءوتتى. توقاەۆ ءوز سوزىندە ەكى ەل اراسىنداعى دوستىق پەن باۋىرلاستىق قاتىناستى نىعايتۋعا قوسقان ۇلەسىن ەرەكشە باعالادى.
«بۇل جوعارى ناگرادا دوستىق، بەيبىتشىلىك جانە قۇرمەت سەكىلدى قۇندىلىقتاردى، سونىمەن قاتار وزبەك حالقىنىڭ رۋحىن ايشىقتايدى. قازاقستان مەن وزبەكستاننىڭ دوستىعى – باعا جەتپەس بايلىعىمىز. ءبىز ونى ساقتاپ، باۋىرلاس حالىقتاردىڭ يگىلىگى ءۇشىن وركەندەتەمىز. بىرلەسكەن قاجىر-قايراتتىڭ ارقاسىندا ستراتەگيالىق سەرىكتەستىك پەن وداقتاستىقتى جاڭا مازمۇنمەن بايىتا بەرەمىز»، – دەدى قاسىم-جومارت توقاەۆ.
وزبەكستان پرەزيدەنتى شاۆكات ميرزيوەۆ قازاقستاننىڭ الەۋمەتتىك-ەكونوميكالىق دامۋى مەن حالىقارالىق ارەناداعى جەتىستىكتەرى تىكەلەي توقاەۆتىڭ باسشىلىعىنا بايلانىستى ەكەنىن اتاپ ءوتتى.
«سىزگە، ەلىمىزدىڭ شىن جاناشىرىنا، وزبەكستاننىڭ جوعارى مەملەكەتتىك ناگراداسىن تابىستاۋ مەن ءۇشىن ۇلكەن مارتەبە. بۇل – كوپۇلتتى وزبەكستان حالقىنىڭ قازاقستان پرەزيدەنتىنىڭ ەرەن ەڭبەگىنە كورسەتكەن قۇرمەتى مەن باعاسى. ءسىزدى بۇكىل الەم كورنەكتى مەملەكەت جانە ساياسي قايراتكەر رەتىندە تانيدى. ءسىزدىڭ باسشىلىعىڭىزبەن ادىلەتتى قازاقستانعا باعىتتالعان اۋقىمدى رەفورمالار جۇرگىزىلۋدە، بارلىق سالادا جەتىستىكتەر بار. قازاقستاندىقتاردىڭ ەرتەڭگە سەنىمى زور»، – دەدى شاۆكات ميرزيوەۆ.
ماراپات ءراسىمى ەكى ەل اراسىنداعى ستراتەگيالىق سەرىكتەستىك پەن باۋىرلاستىق بايلانىستاردى ودان ءارى نىعايتۋعا دەگەن ماڭىزدى قادام رەتىندە باعالانىپ وتىر.
