استاناداعى تاۋەلسىزدىك سارايىندا قازاقستان پرەزيدەنتى قاسىم-جومارت توقاەۆتىڭ شاقىرۋىمەن مەملەكەتتىك ساپارمەن قازاقستانعا كەلگەن ومان سۇلتانى حايسام بەن تاريك ءال ءسايدتى رەسمي قارسى الۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
سالتاناتتى ءراسىم بارىسىندا قاسىم-جومارت توقاەۆ پەن حايسام بەن تاريك ءال سايد رەسمي دەلەگاتسيا مۇشەلەرىن ءبىر-بىرىنە تانىستىردى.
ودان كەيىن قۇرمەت قاراۋىلى روتاسىنىڭ باستىعى راپورت بەرىپ، قازاقستان مەن وماننىڭ مەملەكەتتىك ءانۇراندارى ورىندالدى. راسىمنەن سوڭ ەكى ەل باسشىلارى كەلىسسوز جۇرگىزۋگە كىرىستى.
ايتا كەتەيىك، 5 قازاندا قاسىم-جومارت توقاەۆ استانا اۋەجايىندا ومان سۇلتانىن قارسى العان بولاتىن. مەملەكەت باسشىلارى اۋەجايدىڭ ۇشۋ الاڭىندا قىسقاشا اڭگىمەلەسىپ، الداعى كەلىسسوزدەردىڭ ماڭىزىن اتاپ ءوتتى.
قاسىم-جومارت توقاەۆ ومان سۇلتانىنىڭ ساپارى قازاقستان مەن ومان اراسىنداعى ەكىجاقتى بايلانىستى دامىتۋ ءۇشىن تاريحي ماڭىزى بار ەكەنىن ايتقان.
«ەلىڭىز ءوز وڭىرىندە عانا ەمەس، ودان تىس جەرلەردە، سونىڭ ىشىندە قازاقستاندا دا لايىقتى بەدەلگە يە. ەكى ەل اراسىنداعى سەرىكتەستىكتىڭ الەۋەتى زور ەكەنىنە سەنىمدىمىن. الداعى ۋاقىتتا وسى مۇمكىندىكتى تولىق اشىپ، ءتيىمدى جۇزەگە اسىرۋىمىز قاجەت»، – دەدى پرەزيدەنت.
ءوز كەزەگىندە حايسام بەن تاريك ءال سايد قازاقستان تاراپىنا جىلى قابىلداعانى ءۇشىن العىس ءبىلدىرىپ، الداعى كەلىسسوزدەردىڭ مازمۇندى ءارى ناتيجەلى وتەتىنىنە سەنىم ءبىلدىردى.
