الماتىدا تۇراتىن بەلارۋس ازاماتى تاتيانا مەزينا ۇلتارالىق ارازدىقتى قوزدىرعانى ءۇشىن 2 جىلعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى.
مەدەۋ اۋداندىق قىلمىستىق ىستەر جونىندەگى سوتى 38 جاستاعى تاتيانا مەزيناعا قاتىستى ۇكىم شىعاردى. وعان قىلمىستىق كودەكستىڭ 174-بابى بويىنشا ايىپ تاعىلعان.
ءىس ماتەريالدارىنا سايكەس، ول ۋكراينالىق بلوگەر “Xan VASYL” ەسىمدى قولدانۋشىمەن “چات-رۋلەتكادا” سويلەسۋ بارىسىندا تىلگە جانە اۋماقتىق تۇتاستىققا قاتىستى ۇلتارالىق ارازدىقتى قوزدىراتىن پىكىرلەر ايتقان.
"قازاقستاننىڭ رەسەيگە قايتا ورالعانىن، رەسەيدىڭ قاراماعىنا وتكەنىن قالايسىز با؟" دەگەن سۇراققا ايىپتالۋشى ء“يا، ءدىنىمدى اۋىستىرامىن، بەلارۋستى دە السىن، ءبارىن السىن، ءبىر ەل بولايىق. قازاقستان رەسەي بولسىن”، – دەپ جاۋاپ بەرگەن.
سونداي-اق رەسەي اسكەرى قازاقستانعا كەلسە، قۋانا قارسى الاتىنىن جانە سولاردىڭ جاعىنا وتەتىنىن اشىق ايتقان.
سۋديا زالينا ماحارادزە سوتتالۋشىنىڭ كىناسىن مويىنداۋىن جانە وكىنۋىن ەسكەرىپ، وعان ەڭ تومەنگى جازا – 2 جىل باس بوستاندىعىنان ايىرۋ تۋرالى ۇكىم شىعاردى. ايتا كەتەيىك، بۇل باپ بويىنشا ەڭ اۋىر جازا 7 جىلعا دەيىن باس بوستاندىعىنان ايىرۋدى كوزدەيدى.
