قازاقستان–پاكىستان سپورت ورتالىعى «Dostyq» سالتاناتتى تۇردە اشىلدى. بۇل شارا قر پرەزيدەنتى قاسىم-جومارت توقاەۆتىڭ پاكىستانعا مەملەكەتتىك ساپارى اياسىندا ءوتتى.
2026 جىلعى 2–4 اقپان ارالىعىندا يسلاماباد قالاسىندا قازاقستان رەسپۋبليكاسى تۋريزم جانە سپورت مينيسترلىگىنىڭ جانە قازاقستان رەسپۋبليكاسىنىڭ توعىزقۇمالاق فەدەراتسياسىنىڭ وكىلدەرى پاكىستان يسلام رەسپۋبليكاسىنا جۇمىس ساپارىمەن باردى. ساپار پاكىستانعا جوسپارلانعان مەملەكەتتىك ساپارعا دايىندىق اياسىندا ۇيىمداستىرىلدى.
ساپاردىڭ نەگىزگى ماقساتى – قازاقستان مەن پاكىستان اراسىنداعى ينتەللەكتۋالدىق سپورت تۇرلەرى، ونىڭ ىشىندە توعىزقۇمالاقتى حالىقارالىق دەڭگەيدە دامىتۋ، بىرلەسكەن ءبىلىم بەرۋ جانە سپورتتىق جوبالاردى ىسكە اسىرۋ، سونداي-اق سپورتتىق ديپلوماتيانى نىعايتۋ بولدى.
دەلەگاتسيا قۇرامى
قازاقستان تاراپىنان ساپارعا قر تۋريزم جانە سپورت ۆيتسە-ءمينيسترى راپيكوۆ باۋىرجان سەريكبايۇلى ، مينيسترلىك وكىلدەرى، قازاقستان رەسپۋبليكاسىنىڭ توعىزقۇمالاق فەدەراتسياسىنىڭ باسشىلىعى مەن جەتەكشى سپورتشىلارى قاتىستى.
دەلەگاتسيا قۇرامىندا قر توعىزقۇمالاق فەدەراتسياسىنىڭ پرەزيدەنتى اكىم تۇرسىن، توعىزقۇمالاقتان 3 دۇركىن الەم چەمپيونى سەرىك اقتاەۆ، قر توعىزقۇمالاق فەدەراتسياسىنىڭ اتقارۋشى ديرەكتورى ازامات قالدىباەۆ جانە حالىقارالىق دارەجەدەگى سپورت شەبەرلەرى، ۇلتتىق زياتكەرلىك سپورت ءتۇرىن ناسيحاتتاۋشى ماماندار بولدى.
نەگىزگى ءىس-شارالار
3 اقپان كۇنى يسلاماباد قالاسىنداعى Pakistan Sports Board بازاسىندا ورنالاسقان قازاقستان–پاكىستان سپورت ورتالىعى «Dostyq» سالتاناتتى تۇردە اشىلدى.
اشىلۋ راسىمىندە قازاقستان رەسپۋبليكاسى مەن پاكىستان يسلام رەسپۋبليكاسىنىڭ مەملەكەتتىك ءانۇراندارى ورىندالدى. پاكىستاننىڭ پروۆينتسياارالىق ۇيلەستىرۋ جونىندەگى فەدەرالدى حاتشىسى جانە قر تۋريزم جانە سپورت ۆيتسە-ءمينيسترى قۇتتىقتاۋ ءسوز سويلەدى. وسى جەردە توعىزقۇمالاق پەن شاحمات سىنىپتارىنىڭ رەسمي تانىستىرىلىمى ءوتتى. قازاقستاندىق ماماندار توعىزقۇمالاقتىڭ تاريحى، ەرەجەلەرى جانە حالىقارالىق دامۋ پەرسپەكتيۆالارى تۋرالى بايانداما جاسادى.
سونىمەن قاتار، توعىزقۇمالاقتان 3 دۇركىن الەم چەمپيونى سەرىك اقتاەۆ پاكىستاندىق سپورتشىلار مەن جاتتىقتىرۋشىلارعا ارناپ شەبەرلىك ساباعىن وتكىزدى. ساباق بارىسىندا ويىننىڭ ستراتەگيالىق ەرەكشەلىكتەرى، وقۋ-جاتتىعۋ ادىستەمەلەرى جانە حالىقارالىق جارىستارعا دايىندىق تاجىريبەسىمەن ءبولىستى.
قۇجاتتارعا قول قويۋ
ساپار بارىسىندا ينتەللەكتۋالدىق جانە ۇلتتىق سپورت تۇرلەرىن دامىتۋعا باعىتتالعان كەلەسى ماڭىزدى قۇجاتتارعا قول قويىلدى.
قازاقستان–پاكىستان «Dostyq» سپورت ورتالىعىن قۇرۋ تۋرالى مەموراندۋم ءتۇزىلدى. قازاقستان مەن پاكىستان اراسىنداعى 2026 جىلعا ارنالعان سپورتتىق ءىس-شارالار جول كارتاسى، ونىڭ ىشىندە توعىزقۇمالاق بويىنشا بىرلەسكەن تۋرنيرلەر مەن وقۋ سەمينارلارىن وتكىزۋ كەلىسىلدى. توعىزقۇمالاقتى پاكىستان اۋماعىندا دامىتۋعا باعىتتالعان ىنتىماقتاستىق جونىندەگى ۋاعدالاستىقتار جاسالدى.
مادەني باعدارلاما
رەسمي ءىس-شارالارمەن قاتار، دەلەگاتسيا يسلاماباد قالاسىنداعى «لوك ۆيرسا» حالىقتىق مۇرا مۋزەيىن جانە پاكىستان مونۋمەنتىن ارالادى. پاكىستاندىق ارىپتەستەر تاراپىنان رەسمي قابىلداۋلار مەن جۇمىس كەزدەسۋلەرى ۇيىمداستىرىلدى.
ساپاردىڭ ماڭىزى
بۇل ساپار قازاقستان مەن پاكىستان اراسىنداعى دوستىق قارىم-قاتىناستى نىعايتىپ قانا قويماي، توعىزقۇمالاقتى حالىقارالىق دەڭگەيدە ىلگەرىلەتۋگە، بىرلەسكەن وقۋ-جاتتىعۋ جيىندارىن، تۋرنيرلەر مەن ءبىلىم بەرۋ باعدارلامالارىن وتكىزۋگە جاڭا مۇمكىندىكتەر اشتى.
قازاقستان رەسپۋبليكاسىنىڭ توعىزقۇمالاق فەدەراتسياسى ءۇشىن بۇل ساپار ۇلتتىق زياتكەرلىك سپورت ءتۇرىن وڭتۇستىك ازيا ايماعىندا تانىتۋ جولىنداعى ماڭىزدى قادام بولدى.
