Aqmola oblysy belsendı ömır saltyn ūstanuşylardyŋ basyn qosatyn ortalyqtardyŋ bırı ekenın taǧy bır märte däleldep, besınşı mereitoilyq ZERENDA HALF MARATHON halyqaralyq marafonyn qabyldady. Oǧan älemnıŋ tükpır-tükpırınen sportşylar qatysty.
«Qysqa uaqyt ışınde būl marafon halyqaralyq märtebege ie boldy. Biyl jarysqa 11 elden 1,5 myŋǧa juyq sport äuesqoiy tırkeldı. Qatysuşylardyŋ barlyq tılekterın eskerıp, balalar jarysynan bastap, jartylai marafon jäne 30 şaqyrymdyq jügıruge deiın türlı qaşyqtyqtar äzırlendı. Aita ketu kerek, soŋǧy bır jylda oblys aumaǧynda 50-den astam balalar sport alaŋy jäne 13 ırı sport nysany salyndy», - dedı Aqmola oblysy äkımınıŋ orynbasary Dosūlan Aitbaev.
Jarys baǧyty Zerendı kölın ainala qorşaǧan asfalttalǧan joldarmen, qyrattar men ormandardyŋ arasymen öttı. Biyl Zerendıde marafon besınşı ret ūiymdastyryldy. Sporttyq şaraǧa qatysuşylar sany jyl saiyn artyp, ärtürlı jastaǧy belsendı ömır saltyn ūstanuşylardyŋ qyzyǧuşylyǧyn arttyryp keledı. Biylǧy jarystyŋ eŋ jas qatysuşysy 6 jasta bolsa, eŋ egde sportşynyŋ jasy 77-de.
Jarystaǧy jeŋımpazdardyŋ quanyşy men sporttyq tartys merekelık köŋıl küidı aişyqtai tüstı. Jarys jeŋımpazdarynyŋ bırı Erlan Taitleuov öz äserımen bölıstı.
«Men Astanadan keldım. Būl men üşın kütpegen nätije boldy. Özım şaŋǧy sportymen ainalysamyn. Soŋǧy üş-tört jylda marafondarǧa belsendı qatysa bastadym. Bastapqy maqsatym alǧaşqy bestıkke kıru edı. Alaida märege jaqyndaǧanda adrenalinmen jyldamdyqty arttyryp, bırınşı bolyp keldım. Osyndai körıktı jerde jügıru - ekı ese läzzat. Ūiymdastyruşylarǧa jäne basqa sportşylarǧa raqmet. Atmosferasy keremet», - dedı Erlan Taitleuov.
