اقتوبە وبلىسىندا كوپتەن كۇتكەن باسپاناسىنا قول جەتكىزگەن تۇرعىندار ونىڭ ساپاسى مەن قۇنىنا شاعىمدانۋدا، دەپ حابارلايدى "ادىرنا" ۇلتتىق پورتالى كتك- عا سىلتەپ.
بۇل ۇيلەر بالالار ءۇيىنىڭ تاربيەلەنۋشىلەرىنە، جالعىزباستى انالارعا جانە ەرەكشە قاجەتتىلىگى بار بالالاردى تاربيەلەپ وتىرعان وتباسىلارعا بەرىلگەن. الايدا، تۇرعىنداردىڭ ايتۋىنشا، جاڭا ۇيلەردىڭ قۇبىرلارىنان سۋ كەتىپ، توبەدەن جەل سوعىپ، جارىق تۇراقتى جانبايدى.
تۇرعىنداردىڭ ايتۋىنشا، ۇزاق كۇتكەن باسپانانىڭ قۇنى دا قىمبات. نينا شالپاكوۆا 15 جاسىندا مەملەكەتتىك تۇرعىن ءۇي كەزەگىنە تۇرعان. 35 جاسىندا ول مارتوك اۋدانىنان جالعا بەرىلەتىن پاتەردىڭ كىلتىن الدى. باستاپقىدا قۋانىشى قوينىنا سىيماعان ول، كەيىن ءۇيدىڭ باعاسىن بىلگەندە كوڭىلى قالعان.
ء"ۇي الاتىنىما مۇلدە سەنبەدىم. بۇل حاباردى ەستىگەندە قاتتى قۋاندىم. بىراق كەيىن شارتتاردى بىلگەندە، "وتە قىمبات" دەدىم. 21 ميلليون تەڭگە! بۇل مۇلدە دۇرىس ەمەس", – دەدى مارتوك كەنتىنىڭ تۇرعىنى نينا شالپاكوۆا.
جاڭا عيماراتتاعى پاتەرلەردىڭ كىلتى 22 قاڭتاردا 38 وتباسىعا تابىستالدى. الايدا جاڭا قونىستانۋشىلار كەلىسىمشارتتى كورمەگەن. ونىڭ ۇستىنە ۇيلەردىڭ ساپاسى كوڭىل كونشىتپەيدى. تۇرعىندار مۇنداي تۇرعىن ءۇي ءۇشىن اي سايىن 20 مىڭ تەڭگە تولەۋ جانە كوممۋنالدىق قىزمەتتەرگە قاراجات جۇمساۋ تىم قىمبات ەكەنىن ايتادى.
"بىزگە ەشقانداي قۇجات بەرىلمەدى. كەلىپ كىلتتى الىپ كەتىڭىزدەر دەپ شاقىردى. قۇنى دا، ەشتەڭەسى دە ايتىلمادى. مۇندا جارىق جانبايدى. توبەدەن جەل سوعادى. تۇندە ۇيىقتاۋ مۇمكىن ەمەس. مۇنداي ءۇيدى 21 ميلليون تەڭگەگە باعالاۋ ارتىق", – دەدى تاعى ءبىر تۇرعىن اناستاسيا تسىمبال.
تۇرعىنداردىڭ ايتۋىنشا، بۇل جالعا بەرىلەتىن ۇيلەردىڭ قۇرىلىسى ءتورت جىل بۇرىن باستالعان. ىرگەتاسى قۇيىلىپ، قابىرعالارى كوتەرىلگەن سوڭ، جۇمىستار اياقسىز قالعان. قاڭتار ايىندا عانا العاشقى قونىستانۋشىلار كوشىپ كەلگەن.
قۇرىلىس ماتەريالدارىنىڭ قىمباتتاۋىنا بايلانىستى قۇرىلىس جۇمىستارى كەيىنگە قالدىرىلعان. بۇل تۇرعىن ۇيلەردىڭ تۇپكىلىكتى باعاسىنا اسەر ەتكەن. اۋدان اكىمدىگى تۇرعىن ۇيلەردىڭ جالعا الۋ قۇنى قولايلى دەپ ەسەپتەيتىنىن ايتادى.
"باعاسى قولايلى، ويتكەنى مارتوكتەگى جالدامالى ۇيلەردىڭ نارىقتىق باعاسى ايىنا 30-50 مىڭ تەڭگە ارالىعىندا. ال قۇرىلىس ساپاسى بويىنشا شاعىمدار تۇسپەدى", – دەدى مارتوك اۋدانى اكىمىنىڭ ورىنباسارى اسلان ايتماعامبەتوۆ.
