الماتى اكىمى دارحان ساتىبالدى 1 قازاندا اتاپ وتىلەتىن حالىقارالىق قارتتار كۇنىنە وراي قالالىق ارداگەرلەر كەڭەسى تورالقاسىنىڭ مۇشەلەرىمەن كەزدەستى.
الماتى قالالىق ارداگەرلەر كەڭەسىنىڭ توراعاسى اقان بيجانوۆ قالالىق كەڭەستىڭ قىزمەتى تۋرالى، ال ناۋرىزباي اۋداندىق ارداگەرلەر كەڭەسىنىڭ توراعاسى مادەنيەت كاركەنوۆ اۋداندىق ۇيىمنىڭ جۇمىسى جونىندە باياندادى.
دارحان ساتىبالدى اعا بۋىن وكىلدەرىنىڭ الماتىنىڭ قوعامدىق ومىرىندەگى، جاستار تاربيەسىندەگى جانە ۇرپاق ساباقتاستىعىن ساقتاۋداعى ماڭىزدى ءرولىن اتاپ ءوتتى.
قالادا قارتتاردى قولداۋعا باعىتتالعان بىرقاتار شارا جۇزەگە اسىرىلىپ كەلەدى. اتاپ ايتقاندا، 2022 جىلدان بەرى «بەلسەندى ۇزاق ءومىر» جوباسى قولعا الىنعان. 2026 جىلدىڭ باسىنان بەرى قالالىق بەلسەندى ۇزاق ءومىر ءسۇرۋ ورتالىعى زەينەتكەرلەرگە 38 مىڭنان استام قىزمەت كورسەتتى.
«التىن جاس» باعدارلاماسى اياسىندا 2026 جىلى قالاداعى 157 ۇيىمدا 391 زەينەتكەر جۇمىسپەن قامتىلدى. سونىمەن قاتار ارداگەرلەر ۇيىمدارىن قولداۋ جالعاسىپ وتىر. مەملەكەتتىك الەۋمەتتىك تاپسىرىس اياسىندا ارداگەرلەردى قولداۋعا باعىتتالعان ءۇش جىلدىق جوبا جۇزەگە اسىرىلىپ جاتىر.
الماتىلىق قارتتارعا الەۋمەتتىك كومەك، سونىڭ ىشىندە ساناتوري-كۋرورتتىق ەم ۇسىنىلادى. جىل باسىنان بەرى بۇل مۇمكىندىكتى 472 زەينەتكەر پايدالاندى.
كەزدەسۋدە ارداگەرلەر كەڭەسىنىڭ قوعامدىق باستامالاردى جۇزەگە اسىرۋداعى رولىنە دە ەرەكشە نازار اۋدارىلدى. كەڭەس وكىلدەرى جاس ۇرپاقتى پاتريوتتىق جانە رۋحاني-ادامگەرشىلىك تۇرعىدا تاربيەلەۋگە، سونداي-اق مادەني، سپورتتىق جانە تانىمدىق ءىس-شارالاردى ۇيىمداستىرۋعا اتسالىسىپ كەلەدى.
بۇل جۇمىس مەملەكەت باسشىسى قاسىم-جومارت توقاەۆ ايقىنداعان ۇرپاق ساباقتاستىعىن نىعايتۋ، اعا بۋىندى قولداۋ جانە ازاماتتىق قوعامدى دامىتۋ باسىمدىقتارى اياسىندا جۇرگىزىلىپ كەلەدى.
تاراپتار سونداي-اق اكىمدىك پەن ارداگەرلەر كەڭەسىنىڭ الداعى ءوزارا ءىس-قيمىل ماسەلەلەرىن تالقىلادى. حالىقارالىق قارتتار كۇنىنە ارنالعان ايلىق اياسىندا الماتىنىڭ بارلىق اۋدانىندا مادەني جانە سپورتتىق ءىس-شارالار، سونداي-اق اعا بۋىن وكىلدەرىنىڭ جاستارمەن كەزدەسۋلەرى جوسپارلانعان.
كەزدەسۋ سوڭىندا دارحان ساتىبالدى اعا بۋىن وكىلدەرىن حالىقارالىق قارتتار كۇنىمەن قۇتتىقتاپ، ولارعا زور دەنساۋلىق، اماندىق جانە ۇزاق عۇمىر تىلەدى.
