Almaty äkımı Darhan Satybaldy 1 qazanda atap ötıletın Halyqaralyq qarttar künıne orai qalalyq Ardagerler keŋesı töralqasynyŋ müşelerımen kezdestı.
Almaty qalalyq Ardagerler keŋesınıŋ töraǧasy Aqan Bijanov qalalyq keŋestıŋ qyzmetı turaly, al Nauryzbai audandyq Ardagerler keŋesınıŋ töraǧasy Mädeniet Kärkenov audandyq ūiymnyŋ jūmysy jönınde baiandady.
Darhan Satybaldy aǧa buyn ökılderınıŋ Almatynyŋ qoǧamdyq ömırındegı, jastar tärbiesındegı jäne ūrpaq sabaqtastyǧyn saqtaudaǧy maŋyzdy rölın atap öttı.
Qalada qarttardy qoldauǧa baǧyttalǧan bırqatar şara jüzege asyrylyp keledı. Atap aitqanda, 2022 jyldan berı «Belsendı ūzaq ömır» jobasy qolǧa alynǧan. 2026 jyldyŋ basynan berı qalalyq Belsendı ūzaq ömır süru ortalyǧy zeinetkerlerge 38 myŋnan astam qyzmet körsettı.
«Altyn jas» baǧdarlamasy aiasynda 2026 jyly qaladaǧy 157 ūiymda 391 zeinetker jūmyspen qamtyldy. Sonymen qatar ardagerler ūiymdaryn qoldau jalǧasyp otyr. Memlekettık äleumettık tapsyrys aiasynda ardagerlerdı qoldauǧa baǧyttalǧan üş jyldyq joba jüzege asyrylyp jatyr.
Almatylyq qarttarǧa äleumettık kömek, sonyŋ ışınde sanatorii-kurorttyq em ūsynylady. Jyl basynan berı būl mümkındıktı 472 zeinetker paidalandy.
Kezdesude Ardagerler keŋesınıŋ qoǧamdyq bastamalardy jüzege asyrudaǧy rölıne de erekşe nazar audaryldy. Keŋes ökılderı jas ūrpaqty patriottyq jäne ruhani-adamgerşılık tūrǧyda tärbieleuge, sondai-aq mädeni, sporttyq jäne tanymdyq ıs-şaralardy ūiymdastyruǧa atsalysyp keledı.
Būl jūmys Memleket basşysy Qasym-Jomart Toqaev aiqyndaǧan ūrpaq sabaqtastyǧyn nyǧaitu, aǧa buyndy qoldau jäne azamattyq qoǧamdy damytu basymdyqtary aiasynda jürgızılıp keledı.
Taraptar sondai-aq äkımdık pen Ardagerler keŋesınıŋ aldaǧy özara ıs-qimyl mäselelerın talqylady. Halyqaralyq qarttar künıne arnalǧan ailyq aiasynda Almatynyŋ barlyq audanynda mädeni jäne sporttyq ıs-şaralar, sondai-aq aǧa buyn ökılderınıŋ jastarmen kezdesulerı josparlanǧan.
Kezdesu soŋynda Darhan Satybaldy aǧa buyn ökılderın Halyqaralyq qarttar künımen qūttyqtap, olarǧa zor densaulyq, amandyq jäne ūzaq ǧūmyr tıledı.
