شىمكەنتتە الەۋمەتتىك جانە كولىك ينفراقۇرىلىمى سالاسىنداعى بىردەن ءۇش ءىرى جوبانى ىسكە اسىرۋ باستالدى. قالادا اۋىسىمىنا 500 ادام قابىلدايتىن جاڭا ەمحانا مەن №2 قالالىق كوپبەيىندى اۋرۋحانانىڭ 80 توسەك-ورىنعا ارنالعان قوسىمشا كورپۋسىنىڭ قۇرىلىس الاڭدارىندا كاپسۋلا سالۋ ءراسىمى ءوتتى.
سونىمەن قاتار ۇزىندىعى 50 شاقىرىم بولاتىن اينالما اۆتوموبيل جولىنىڭ قۇرىلىسىنا ستارت بەرىلدى. اتالعان جوبالار مەملەكەت باسشىسىنىڭ تاپسىرماسى بويىنشا جۇزەگە اسىرىلۋدا. ولار حالىق سانىنىڭ وسۋىنە بايلانىستى ينفراقۇرىلىمعا ارتقان قاجەتتىلىكتى قامتاماسىز ەتۋگە باعىتتالعان. ءىس-شارالارعا قالا اكىمى عابيت سىزدىقبەكوۆ قاتىستى.
«Shymkent City» شاعىناۋدانىندا اۋىسىمىنا 500 ادام قابىلدايتىن جاڭا ەمحانا سالىنادى. مەديتسينالىق مەكەمە 30 مىڭنان استام تۇرعىنعا قىزمەت كورسەتەدى. مۇندا ەرەسەكتەر جانە بالالار بولىمدەرى، ايەلدەر كونسۋلتاتسياسى، وتباسىلىق دەنساۋلىق ورتالىعى، كلينيكالىق-دياگنوستيكالىق زەرتحانا، كت جانە مرت كابينەتتەرى، ەندوسكوپيا جانە رەنتگەنودياگنوستيكا كابينەتتەرى ورنالاسادى.
سونداي-اق 20 ورىندىق كۇندىزگى ستاتسيونار، امبۋلاتوريالىق حيرۋرگيا ورتالىعى جانە وڭالتۋ ءبولىمى قاراستىرىلعان. جوبالاۋ كەزىندە بالالار مەن وتباسىلارعا مەديتسينالىق قىزمەت كورسەتۋگە ەرەكشە كوڭىل بولىنگەن. بالالار بولىمشەلەرى جەكە ليفتتەرى مەن كۇتۋ ايماقتارى بار ءبىر قاباتقا ورنالاستىرىلادى. بەس جاسقا دەيىنگى بالالارعا كۇتىم جاساۋ جانە پاتروناج قىزمەتى ۇيىمداستىرىلىپ، جۇكتى ايەلدەر مەن بوسانعاننان كەيىنگى انالاردىڭ دەنساۋلىعىنا باقىلاۋ جۇرگىزىلەدى.
قالالىق #2 كوپبەيىندى اۋرۋحانانىڭ قوسىمشا كورپۋسى 80 توسەك-ورىنعا ەسەپتەلگەن. اۋرۋحانا جىل سايىن شامامەن 20 مىڭ ناۋقاستى قابىلداپ، نەيروحيرۋرگيا، كارديولوگيا، ينسۋلتتىك كومەك، رەانيماتسيا جانە پەريناتالدىق مەديتسينا باعىتتارى بويىنشا مەديتسينالىق قىزمەت كورسەتەدى.
جاڭا عيماراتتا نەيروحيرۋرگيا جانە كارديورەانيماتسيا باعىتتارى دامىتىلىپ، ينسۋلت، ينفاركت جانە جەدەل كورونارلىق سيندرومعا شالدىققان ناۋقاستارعا مەديتسينالىق كومەك كورسەتۋ مۇمكىندىگى كەڭەيەدى. جاڭا كورپۋس قولدانىستاعى ستاتسيونارلىق جانە پەرزەنتحانا كورپۋستارىمەن جابىق گالەرەيا ارقىلى جالعانىپ، بىرىڭعاي مەديتسينالىق كلاستەر قۇرىلادى.
سونىمەن قاتار قالادا ۇزىندىعى 50 شاقىرىم بولاتىن اينالما اۆتوموبيل جولىنىڭ قۇرىلىسى باستالدى. ءتورت جولاقتى ماگيسترال الماتى–تەرمەز اۆتوموبيل جولى ارقىلى الماتى باعىتىنان شىمكەنتكە كىرەبەرىستى سولتۇستىك اينالما جولمەن جانە تاشكەنت باعىتىنا شىعاتىن جولمەن بايلانىستىرادى.
جاڭا جول حالىقارالىق جانە رەسپۋبليكالىق ترانزيتتىك كولىكتەردى قالانىڭ ەلدى مەكەن اۋماعىنان تىس باعىتتاۋعا ارنالعان. بۇل كولىك اعىندارىن قايتا بولۋگە، نەگىزگى كوشەلەردەگى جۇكتەمەنى ازايتۋعا جانە قالا ىشىندەگى جۇك كولىكتەرىنىڭ قوزعالىسىن قىسقارتۋعا مۇمكىندىك بەرەدى.
جوبا ينتەللەكتۋالدى كولىك جۇيەلەرىن جانە قاجەتتى ينجەنەرلىك ينفراقۇرىلىمدى قامتيدى. قۇرىلىس كەزەڭىندە 500-دەن استام جۇمىس ورنى اشىلادى. جول پايدالانۋعا بەرىلگەننەن كەيىن ونى كۇتىپ-ۇستاۋعا شامامەن 100 مامان تارتىلادى.
قالا اكىمى عابيت سىزدىقبەكوۆ شىمكەنتتىڭ دامۋى الەۋمەتتىك جانە كولىك ينفراقۇرىلىمىن قاتار كەڭەيتۋدى تالاپ ەتەتىنىن اتاپ ءوتتى.
«پرەزيدەنتتىڭ تاپسىرماسىنا سايكەس شىمكەنتتىڭ جايلى ءومىر سۇرۋىنە جانە ودان ءارى دامۋىنا قاجەتتى ينفراقۇرىلىمدى كەزەڭ-كەزەڭىمەن دامىتىپ كەلەمىز. جاڭا مەديتسينالىق نىساندار تۇرعىندارعا مەديتسينالىق كومەك كورسەتۋ مۇمكىندىگىن كەڭەيتسە، اينالما جول ترانزيتتىك كولىكتى قالا اۋماعىنان تىس باعىتتاپ، جول جەلىسىنە تۇسەتىن جۇكتەمەنى ازايتۋعا مۇمكىندىك بەرەدى»، – دەدى عابيت سىزدىقبەكوۆ.
ايتا كەتەيىك، اتالعان جوبالاردى ىسكە اسىرۋ مەديتسينالىق كومەكتىڭ قولجەتىمدىلىگىن ارتتىرىپ، قالالىق دەنساۋلىق ساقتاۋ جۇيەسىنىڭ مۇمكىندىكتەرىن كەڭەيتۋگە جانە كولىك قاتىناسىن جاقسارتۋعا مۇمكىندىك بەرەدى. بۇل ءوز كەزەگىندە شىمكەنتتىڭ ودان ءارى دامۋىنا قاجەتتى جاعداي قالىپتاستىرادى.
