اقمولا وبلىسىندا «كىتاپ وقيتىن ۇلت – چيتايۋششايا ناتسيا» ۇلتتىق مارافونىنا قاتىسۋ ءۇشىن 35 مىڭعا جۋىق ادام تىركەلدى. جوباعا مەكتەپ وقۋشىلارى، ستۋدەنتتەر، پەداگوگتەر، مەملەكەتتىك قىزمەتشىلەر، وتباسىلار جانە ءوڭىر تۇرعىندارى قاتىسىپ جاتىر. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە وبلىس اكىمىنىڭ ورىنباسارى دوسۇلان ايتباەۆ، مادەنيەت باسقارماسىنىڭ باسشىسى نۇرعيسا داۋەشوۆ جانە وڭىرلىك جوبالىق كەڭسە جەتەكشىسى جانار جۋنۋسوۆا مالىمدەدى.
وبلىستا مارافون تامىز ايىندا باستالىپ، قىركۇيەك ايىنان باستاپ بارلىق 20 اۋدان مەن قالادا قاتىسۋشىلاردى بەلسەندى تىركەۋ جۇمىستارى جۇرگىزىلدى. جوبا «وقيتىن مەكتەپ»، «وقيتىن ۋنيۆەرسيتەت»، «وقيتىن وتباسى»، «كىتاپ وقيتىن زياتكەر» سياقتى جەتى نەگىزگى باعىتتى قامتيدى. قاتىسۋشىلار تىزىمگە ەنگەن وتاندىق جانە الەم ادەبيەتىنىڭ 330 كىتابىنان 15 شىعارمانى وقىپ، كەيىن تەستىلەۋ مەن زياتكەرلىك كۆيزدەردەن وتەدى.
«كىتاپ وقۋ – جاڭا ءبىلىم الۋدىڭ عانا ەمەس، وي-ءورىستى كەڭەيتۋدىڭ، تالداۋ جاساۋدى جانە ءوز بەتىنشە قورىتىندى شىعارۋدى ۇيرەنۋدىڭ دە مۇمكىندىگى. سوندىقتان مارافونعا ءار جاستاعى جانە ءارتۇرلى سالادا ەڭبەك ەتەتىن ادامداردىڭ قاتىسقانى ءبىز ءۇشىن ماڭىزدى»، – دەدى دوسۇلان ايتباەۆ.
جوبانى ىلگەرىلەتۋدە كىتاپحانالارعا دا ەرەكشە ءرول بەرىلىپ وتىر. ءوڭىردىڭ اۋداندىق جانە اۋىلدىق كىتاپحانالارىندا قاجەتتى كىتاپ قورى جاساقتالعان. سونىمەن قاتار بارلىق ورتالىقتاندىرىلعان كىتاپحانالار جۇيەسىندە «زەردەلى ۇلت» اتتى 288 بۇرىش اشىلدى. كىتاپ وقۋعا قىزىعۋشىلىقتى ارتتىرۋ ءۇشىن كىتاپحانالار جانىندا كلۋبتار جۇمىس ىستەيدى. بۇگىندە ولاردىڭ 35 وتىرىسى وتكىزىلدى. الەۋمەتتىك جەلىلەردە وڭىرگە تانىمال تۇرعىنداردىڭ سۇيىكتى كىتاپتارى مەن وقۋ مادەنيەتىنىڭ ماڭىزى تۋرالى ايتاتىن 200-گە جۋىق بەينەسۇحبات جاريالاندى.
«بۇگىندە كىتاپحانا كىتاپ الاتىن ورىن عانا ەمەس، ادامداردىڭ پىكىر الماسىپ، ادەبيەتتى تالقىلايتىن جانە جاڭا وقىرماندىق باستامالارعا جول اشاتىن كەڭىستىك بولۋى كەرەك. ءبىز مۇنداي مۇمكىندىكتەردى وبلىستىڭ قالالارى مەن اۋداندارىندا دا قالىپتاستىرۋعا تىرىسىپ جاتىرمىز»، – دەدى نۇرعيسا داۋەشوۆ.
وڭىردەگى مارافوندى ارنايى قۇرىلعان جوبالىق كەڭسە ۇيلەستىرەدى. ونىڭ قۇرامىنا مەملەكەتتىك ورگانداردىڭ، ءبىلىم، مادەنيەت سالالارىنىڭ جانە جوعارى وقۋ ورىندارىنىڭ وكىلدەرى كىردى. اۋدانداردا اقپاراتتىق كەزدەسۋلەر مەن ءتۇرلى ءىس-شارالار ءوتىپ، جوبانى ناسيحاتتاۋعا جازۋشىلار، قوعام بەلسەندىلەرى جانە ءوڭىردىڭ باسقا دا وكىلدەرى تارتىلۋدا.
جانار جۋنۋسوۆانىڭ ايتۋىنشا، قازىر قاتىسۋشىلار سانىن كوبەيتىپ قانا قويماي، ولاردىڭ مارافون بويى كىتاپ وقۋعا دەگەن قىزىعۋشىلىعىن ساقتاۋ ماڭىزدى.
ء«بىزدىڭ مىندەتىمىز – جوباعا قاتىسۋدى تەك تىركەلۋمەن شەكتەمەۋ. ادامنىڭ كىتاپتى شىنىمەن وقىپ، العان اسەرىمەن ءبولىسىپ، اينالاسىنداعىلاردى دا وسى ۇدەرىسكە تارتقانى ماڭىزدى. سوندىقتان كەزدەسۋلەر وتكىزۋدى، كلۋبتاردىڭ جۇمىسىن دامىتۋدى جانە وقىرمان مادەنيەتىن ناسيحاتتاۋ ءۇشىن الەۋمەتتىك جەلىلەردى پايدالانۋدى جالعاستىرامىز»، – دەدى ول.
مارافوننىڭ نەگىزگى كەزەڭى 2027 جىلدىڭ ناۋرىزىنا دەيىن جالعاسادى. ودان كەيىن قاتىسۋشىلار قورىتىندى تەستىلەۋ مەن كۆيزدەردەن وتەدى. وڭىرلىك كەزەڭنىڭ جەڭىمپازدارى اقمولا وبلىسىن رەسپۋبليكالىق دەڭگەيدە تانىستىرۋ مۇمكىندىگىنە يە بولادى. «كىتاپ وقيتىن ۇلت» مارافونىنىڭ فينالى 23 ءساۋىر – ۇلتتىق كىتاپ كۇنى استانا قالاسىندا وتەدى. قورىتىندى بويىنشا ەلىمىزدىڭ ۇزدىك ون وقىرمانى انىقتالادى.
