اقمولا وبلىسىنىڭ ون مىڭداعان تۇرعىنى دۇنيەجۇزىلىك تازالىق كۇنى (World Cleanup Day) اياسىندا ۇيىمداستىرىلعان اۋقىمدى ەكولوگيالىق اكتسياعا قاتىستى. يگى باستاماعا قالا تۇرعىندارىمەن قاتار اۋىل حالقى دا بەلسەندى اتسالىستى.
اكتسيا بارىسىندا اقمولالىقتار قوعامدىق اۋماقتاردى تازالاپ، الەۋمەتتىك نىسانداردىڭ ماڭىن اباتتاندىردى. ەكولوگيالىق ءىس-شارا «تازا قازاقستان» جالپىۇلتتىق باعدارلاماسى اياسىندا ءوتتى.
اقكول قالاسىندا وتكەن اكتسياعا قاتىسقان اقمولا وبلىسىنىڭ اكىمى مارات احمەتجانوۆ ەكولوگيالىق مادەنيەت كۇندەلىكتى ءومىر سالتىنىڭ ماڭىزدى بولىگىنە اينالىپ كەلە جاتقانىن اتاپ ءوتتى.
««تازا قازاقستان» باستاماسى – بۇل تەك كوشەلەردى تازالاۋ، اۋماقتاردى اباتتاندىرۋ جانە اعاش وتىرعىزۋ عانا ەمەس. بۇل، ەڭ الدىمەن، ءار ادامنىڭ قورشاعان ورتاعا، ءوز قالاسىنا، اۋىلىنا جانە تۋعان جەرىنە دەگەن جاۋاپكەرشىلىگى. تازا قازاقستان – بۇل تەك تازا كوشەلەر مەن قالالار ەمەس. بۇل – ويىمىزدىڭ، نيەتىمىزدىڭ جانە ءىسىمىزدىڭ تازالىعى. بۇگىندە اتقارىلعان جۇمىستاردىڭ ناقتى ناتيجەسىن كورىپ وتىرمىز: اۋماقتار اباتتاندىرىلىپ، جاڭا قوعامدىق كەڭىستىكتەر پايدا بولىپ، قالالار مەن اۋىلدار كوركەيىپ كەلەدى»، – دەدى مارات احمەتجانوۆ.
ەكولوگيالىق اكتسيا اياسىندا تۇرعىندار كوشەلەر مەن اۋلالاردى قوقىستان تازارتىپ قانا قويماي، اۋقىمدى كوگالداندىرۋ جۇمىستارىنا دا قاتىستى.
ءوڭىردىڭ جاسىل جەلەك قورى قاراعاي، شىرشا، تەرەك، قايىڭ، ۇيەڭكى، بالقاراعاي، ەمەن، جابايى الما جانە باسقا دا باعالى اعاش-بۇتا تۇرلەرىمەن تولىقتى. اكتسيا بارىسىندا بارلىعى 5 مىڭعا جۋىق كوشەت وتىرعىزىلدى.
جەرگىلىكتى ەكواكتيۆيستەردىڭ ايتۋىنشا، اۋماقتاردى تازالاۋ مەن كوگالداندىرۋ جۇمىستارىن قاتار جۇرگىزۋ قورشاعان ورتانىڭ تازالىعىن ساقتاپ قانا قويماي، الداعى جىلدارعا قولايلى ەكولوگيالىق جاعداي قالىپتاستىرۋعا مۇمكىندىك بەرەدى.
ايتا كەتەيىك، كوگالداندىرۋ جۇمىستارى وبلىستا ەكولوگيالىق باعىتتاعى تۇراقتى شارالاردىڭ ءبىرى بولىپ وتىر. جىل باسىنان بەرى وڭىردە 2,8 مىڭ گەكتار اۋماققا 16 ميلليونعا جۋىق اعاش وتىرعىزىلدى.
