قازاقستان ۋكراينادان قارا تەڭىزدەگى قازاقستاندىق كەمەلەرگە دروندار ارقىلى جاسالاتىن شابۋىلدارعا جول بەرمەۋدى سۇرادى. بۇل تۋرالى Ulusmedia اگەنتتىگىنە قازاقستاننىڭ سىرتقى ىستەر ءمينيسترى مۇحتار تىلەۋبەردى مالىمدەدى، دەپ حابارلايدى «ادىرنا» ءتىلشىسى.
بۇعان دەيىن مينيستر بۇۇ باس اسسامبلەياسىنىڭ سەسسياسى اياسىندا ۋكراينا سىرتقى ىستەر ءمينيسترى اندرەي سيبيگامەن كەزدەسكەن.
«ەڭ الدىمەن، ۋكراينالىق تاراپپەن قارا تەڭىزدەگى ءبىزدىڭ كەمەلەرىمىزگە دروندارمەن شابۋىل جاساۋعا بۇدان بىلاي جول بەرمەۋ قاجەتتىگىن تالقىلادىق»، – دەدى تىلەۋبەردى.
ونىڭ ايتۋىنشا، رەسەي سىرتقى ىستەر ءمينيسترى سەرگەي لاۆروۆپەن كەزدەسۋدە قازاقستان تاراپى رەسەي مەن ۋكراينا اراسىنداعى كەلىسسوزدەردى قولدايتىنىن جەتكىزگەن.
«ەگەر ەكى تاراپ تا قازاقستاندا كەلىسسوز وتكىزۋگە نيەت بىلدىرسە، ءبىز قارسى ەمەسپىز. الايدا، ءبىزدىڭ ويىمىزشا، بۇل ماسەلەنى تەك ەكى ەلدىڭ ءوزى شەشۋى كەرەك. ويتكەنى جاۋاپكەرشىلىك وتە جوعارى. ەشقانداي دەلدال سىرتتان ارالاسىپ، بۇل ماسەلەنى تولىق شەشە المايدى»، – دەدى مينيستر.
بۇعان دەيىن نوۆوروسسيسكىدەگى كقك تەرمينالى ارقىلى قازاقستاندىق مۇنايدى تاسىمالداۋعا قاتىسقان كەمەلەر بىرنەشە رەت درون شابۋىلدارىنىڭ نىساناسىنا اينالعان. قازاقستاننىڭ سىرتقى ىستەر مينيسترلىگى بۇل ارەكەتتەردى ەل مۇددەسىنە قول سۇعۋ دەپ باعالاپ، كيەۆكە ەكىجاقتى قارىم-قاتىناسقا كەرى اسەر ەتەتىنىن ەسكەرتكەن بولاتىن. ۋكراينا تاراپى بۇل ەسكەرتۋلەردى نازارعا العانىن مالىمدەگەن.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ كقك ينفراقۇرىلىمىنا جاسالعان شابۋىلداردى رەسەيگە عانا ەمەس، قازاقستان مەن اقش-قا دا باعىتتالعان ارەكەت رەتىندە قاراستىرۋ كەرەكتىگىن ايتقان. سونداي-اق ول مۇنداي شابۋىلداردى «ەنەرگەتيكالىق تەرروريزم» دەپ اتاعان.
بۇعان دەيىن رەسەي سىرتقى ىستەر مينيسترلىگى حالىقارالىق قاۋىمداستىقتى ۋكرايناعا ىقپال ەتىپ، قارا جانە ازوۆ تەڭىزدەرىندەگى جۇك كەمەلەرىنە جاسالاتىن شابۋىلداردى توقتاتۋعا شاقىرعان ەدى. رەسەي پرەزيدەنتى ۆلاديمير پۋتين قارا تەڭىزدەگى تانكەرلەرگە جاسالعان شابۋىلدارعا جاۋاپ رەتىندە ۋكراينانى تەڭىزگە شىعۋ مۇمكىندىگىنەن تولىق ايىرۋى ىقتيمال ەكەنىن مالىمدەگەن.
17 قىركۇيەكتە AFP اگەنتتىگى انكارانىڭ ماسكەۋ مەن كيەۆكە قارا تەڭىزدەگى كەمەلەرگە شابۋىلداردى توقتاتۋعا باعىتتالعان ۇسىنىس جولداعانىن حابارلاعان. ءبىر اپتادان كەيىن كرەمل تۇركيانىڭ مۇنداي باستاما كوتەرگەنىن راستاعانىمەن، بۇل ماسەلە بويىنشا ناقتى كەلىسسوزدەر ءجۇرىپ جاتپاعانىن مالىمدەدى.
