قازاقستان پاسپورتى الەمدەگى ەڭ مىقتى پاسپورتتار رەيتينگىندە 61-ورىنعا ورنالاستى. بۇل تۋرالى حالىقارالىق Henley Passport Index دەرەكتەرى جاريالادى، دەپ حابارلايدى “ادىرنا”.
اقپاراتقا سايكەس، يندەكس ەلدەردىڭ ازاماتتارى ۆيزاسىز بارا الاتىن مەملەكەتتەردىڭ سانىنا قاراي جاسالادى. قازاقستان ازاماتتارىنا قازىرگى تاڭدا 79 ەلگە ۆيزاسىز كىرۋ مۇمكىندىگى بار.
قازاقستان رەيتينگتە بىرقاتار تمد جانە كورشىلەس ەلدەردەن جوعارى تۇر:
- ازەربايجان – 66-ورىن;
- ارمەنيا – 69-ورىن;
- موڭعوليا – 70-ورىن;
- قىرعىزستان – 71-ورىن;
- وزبەكستان – 72-ورىن;
- تاجىكستان – 78-ورىن;
- تۇرىكمەنستان – 84-ورىن.
جاڭا تىزىمدە سينگاپۋر ءبىرىنشى ورىندا (193 ەل), ودان كەيىن جاپونيا مەن وڭتۇستىك كورەيا (190 ەل) تۇر. ال ءتىزىمنىڭ سوڭىنا اۋعانستان، يراك جانە سيريا پاسپورتتارى جايعاسقان.
ايتا كەتسەك، Henley Passport Index – حالىقارالىق اۋە كولىگى قاۋىمداستىعى (IATA) دەرەكتەرىنە نەگىزدەلگەن الەمدىك رەيتينگ. جىلىنا بىرنەشە رەت جاڭارتىلاتىن بۇل يندەكس ساياحاتتاۋشىلارعا پاسپورتتىڭ كۇشىن باعالاۋعا جانە ۆيزاسىز ساياحات مۇمكىندىگىن كورۋگە باعىتتالادى.
