Qazaqstan Ukrainadan Qara teŋızdegı qazaqstandyq kemelerge drondar arqyly jasalatyn şabuyldarǧa jol bermeudı sūrady. Būl turaly Ulusmedia agenttıgıne Qazaqstannyŋ Syrtqy ıster ministrı Mūhtar Tıleuberdı mälımdedı, dep habarlaidy «Adyrna» tılşısı.
Būǧan deiın ministr BŪŪ Bas Assambleiasynyŋ sessiiasy aiasynda Ukraina Syrtqy ıster ministrı Andrei Sibigamen kezdesken.
«Eŋ aldymen, ukrainalyq tarappen Qara teŋızdegı bızdıŋ kemelerımızge drondarmen şabuyl jasauǧa būdan bylai jol bermeu qajettıgın talqyladyq», – dedı Tıleuberdı.
Onyŋ aituynşa, Resei Syrtqy ıster ministrı Sergei Lavrovpen kezdesude Qazaqstan tarapy Resei men Ukraina arasyndaǧy kelıssözderdı qoldaitynyn jetkızgen.
«Eger ekı tarap ta Qazaqstanda kelıssöz ötkızuge niet bıldırse, bız qarsy emespız. Alaida, bızdıŋ oiymyzşa, būl mäselenı tek ekı eldıŋ özı şeşuı kerek. Öitkenı jauapkerşılık öte joǧary. Eşqandai deldal syrttan aralasyp, būl mäselenı tolyq şeşe almaidy», – dedı ministr.
Būǧan deiın Novorossiiskıdegı KQK terminaly arqyly qazaqstandyq mūnaidy tasymaldauǧa qatysqan kemeler bırneşe ret dron şabuyldarynyŋ nysanasyna ainalǧan. Qazaqstannyŋ Syrtqy ıster ministrlıgı būl äreketterdı el müddesıne qol sūǧu dep baǧalap, Kievke ekıjaqty qarym-qatynasqa kerı äser etetının eskertken bolatyn. Ukraina tarapy būl eskertulerdı nazarǧa alǧanyn mälımdegen.
Resei prezidentınıŋ baspasöz hatşysy Dmitrii Peskov KQK infraqūrylymyna jasalǧan şabuyldardy Reseige ǧana emes, Qazaqstan men AQŞ-qa da baǧyttalǧan äreket retınde qarastyru kerektıgın aitqan. Sondai-aq ol mūndai şabuyldardy «energetikalyq terrorizm» dep ataǧan.
Būǧan deiın Resei Syrtqy ıster ministrlıgı halyqaralyq qauymdastyqty Ukrainaǧa yqpal etıp, Qara jäne Azov teŋızderındegı jük kemelerıne jasalatyn şabuyldardy toqtatuǧa şaqyrǧan edı. Resei prezidentı Vladimir Putin Qara teŋızdegı tankerlerge jasalǧan şabuyldarǧa jauap retınde Ukrainany teŋızge şyǧu mümkındıgınen tolyq aiyruy yqtimal ekenın mälımdegen.
17 qyrküiekte AFP agenttıgı Ankaranyŋ Mäskeu men Kievke Qara teŋızdegı kemelerge şabuyldardy toqtatuǧa baǧyttalǧan ūsynys joldaǧanyn habarlaǧan. Bır aptadan keiın Kreml Türkiianyŋ mūndai bastama kötergenın rastaǧanymen, būl mäsele boiynşa naqty kelıssözder jürıp jatpaǧanyn mälımdedı.
