فوتو: قورعانىس مينيسترلىگى
قازاقستان قورعانىس مينيسترلىگى كاسپي تەڭىزىنىڭ اكۆاتورياسىندا جۇرگىزىلگەن ىزدەستىرۋ-قۇتقارۋ وپەراتسياسىنىڭ اياقتالعانىن حابارلادى، دەپ حابارلايدى "ادىرنا".
مينيسترلىكتىڭ مالىمەتىنشە، 25 قىركۇيەك كۇنى ساعات 09:15 شاماسىندا ىزدەۋ جۇمىستارى بارىسىندا بۇعان دەيىن حابارسىز كەتكەن ەكى اسكەري قىزمەتشىنىڭ دەنەسى تابىلعان. ولار – سەرجانت مانسۇر گۋماروۆ پەن ماتروس ميراس تۇردىبەكۇلى.
قايعىلى جاعداي وقۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنەن بولعان. سونىڭ سالدارىنان 17 اسكەري قىزمەتشى اشىق تەڭىزگە اعىپ كەتكەن.
وقيعا كەزىندە ءۇش اسكەري قىزمەتشى قۇتقارىلدى. قالعان 14 اسكەري قىزمەتشى قازا تاپتى.
قازاقستان قورعانىس مينيسترلىگى مەن قارۋلى كۇشتەرىنىڭ باسشىلىعى، سونداي-اق جەكە قۇرامى قازا بولعان اسكەري قىزمەتشىلەردىڭ وتباسى مەن جاقىندارىنا كوڭىل ايتتى.
مينيسترلىك مالىمەتىنشە، مارقۇمداردىڭ وتباسىلارىنا قاجەتتى كومەك كورسەتىلەدى. ونىڭ ىشىندە ماتەريالدىق جانە پسيحولوگيالىق قولداۋ ۇيىمداستىرىلماق.
بۇدان الدىن حابارلانعانداي كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتەردى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋى سالدارىنان اسكەري قىزمەتشىلەردى تەڭىز الىپ كەتكەن. اۋەلدە اعىپ كەتكەن ساربازداردىڭ سانى 19 ادام دەپ جاريالانعانىمەن، سوڭىنان 17 ادام جايلى ايتىلدى. ءۇش اسكەري قىزمەتكەر قۇتقارىلىپ، ولاردىڭ بىرەۋى اۋرۋحاناعا جەتكىزىلگەن.
ىزدەستىرۋ-قۇتقارۋ وپەراتسياسىنا اسكەري-تەڭىز كۇشتەرى، توتەنشە جاعدايلار مينيسترلىگى بولىمشەلەرى، اۆياتسيا جانە وزگە دە ءتيىستى قىزمەتتەر جۇمىلدىرىلعان.
وقيعا ورنىندا پرەمتەر-ءمينيستردىڭ ورىنباسارى قانات بوزىمباەۆتىڭ جەتەكشىلىگىمەن ۇكىمەتتىك كوميسسيا جۇمىس ىستەپ جاتىر. پرەزيدەنت قاسىم-جومارت توقاەۆ قايعىلى وقيعاعا بايلانىستى مارقۇمدارىنا جانۇياسىنا كوڭىل ايتىپ، 25 قىركۇيەكتى جالپىۇلتتىق ازا كۇنى رەتىندە جاريالادى.
كاسپيدەگى وقۋ-جاتتىعۋ "حازار قورعانى - 2026" دەگەن اتپەن وتكىزىلگەن. جاتتىعۋ قورعانىس مينيسترلىگىنىڭ وقۋ-جاتتىعۋدىڭ ستراتەگيالىق كوماندالىق-شتابتىق بىرىڭعاي جوسپار اياسىندا كاسپي تەڭىزىنىڭ قازاقستاندىق سەكتورىندا وتكەن. وعان قازاقستان قارۋلى كۇشتەرى اسكەري-تەڭىز كۇشتەرىنىڭ باس قولباسشىسى، 1-دارەجەلى كاپيتان قانات نيازبەكوۆ جەتەكشىلىك ەتكەن. وقۋ-جاتتىعۋعا اسكەري-تەڭىز كۇشتەرى مەن ولارعا باعىنىستى بولىمشەلەردىڭ 500-دەن استام اسكەري قىزمەتكەر، اسكەري كەمەلەردىڭ ەكيپاجدارى مەن جاعالاۋ بولىمشەلەرى قاتىسقان. ماشىقتانۋعا ۇقك شەكارا قىزمەتىنىڭ ماڭعىستاۋ وبلىسى بويىنشا جاعالاۋ كۇزەتى مەن اۋە قورعانىسى كۇشتەرىنىڭ كۇشتەرى مەن قۇرالدارى تارتىلعان.
