پرەزيدەنت قاسىم-جومارت توقاەۆ بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ مۇمكىندىگىن قاراستىراتىنىن مالىمدەدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، ەلىمىزدە مەملەكەتتىك باسقارۋ جۇيەسىن جاڭعىرتۋ جۇمىستارى جالعاسۋى ءتيىس. وسىعان بايلانىستى جاقىن ارادا ءماسليحات سايلاۋىن وتكىزۋ قاجەتتىلىگى تۋىنداپ وتىر.
قاسىم-جومارت توقاەۆ قازىرگى ءماسليحات دەپۋتاتتارىنىڭ باسىم بولىگى «Amanat» پارتياسىنىڭ اتىنان سايلانعانىن اتاپ ءوتتى.
«جاقىندا ءتيىستى زاڭنامالىق راسىمدەر اياقتالادى. سول كەزدە ءماسليحات دەپۋتاتتارىنىڭ باسىم بولىگىنىڭ قىزمەتىنىڭ زاڭدىلىعىنا قاتىستى ماسەلە تۋىندايدى. جالپى جەرگىلىكتى دەپۋتاتتار ايماقتاعى جۇرتشىلىقتىڭ مۇددەسىن قورعايدى، بيۋدجەتتى بەكىتەدى جانە باسقا دا مىندەتتەردى ورىندايدى. ءبىر سوزبەن ايتقاندا، ەلدى-مەكەندەردى وركەندەتۋ ىسىنە بەلسەنە اتسالىسادى. دەمەك، وكىلدى ورگاندار قىزمەتىنىڭ زاڭعا سايكەس بولۋى ايرىقشا ماڭىزدى. سوندىقتان مەن جاقىن ارادا پرەمەر-مينيسترمەن جانە قۇرىلتاي توراعاسىمەن بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ جونىندە كەڭەسەمىن. سودان سوڭ ءتيىستى جارلىققا قول قويامىن. كوپ ۇزاماي ورتالىق سايلاۋ كوميسسياسى سايلاۋ وتەتىن كۇندى جاريالاۋى كەرەك. بۇل قادام ءماسليحاتتاردىڭ بىلىكتى ءارى كاسىبي كورپۋسىن قالىپتاستىرۋعا جول اشىپ، ونىڭ جۇمىسىنا تىڭ سەرپىن بەرەدى. وسى سايلاۋدىڭ جوعارى دەڭگەيدە جانە ساپالى وتۋىنە سىزدەر دە مول ۇلەس قوساسىزدار دەپ سەنەمىن»،– دەدى مەملەكەت باسشىسى.
