ۇكىمەت قازاقستانداعى ۋاقىت بەلدەۋىن اۋىستىرۋ بويىنشا زەرتتەۋ ناتيجەلەرىن ۇسىندى. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ مالىمدەدى، دەپ حابارلايدى «ادىرنا” ۇلتتىق پورتالى.
«حالىقتىڭ دەنساۋلىعىنا، ەنەرگيا تۇتىنۋىنا جانە ەڭبەك ونىمدىلىگىنە ۋاقىت بەلدەۋلەرىنىڭ وزگەرۋىنىڭ پراكتيكالىق اسەرىن زەرتتەۋ ءۇشىن مەديتسينانىڭ، نەيروعىلىمنىڭ، بيوفيزيكانىڭ، گەنەتيكانىڭ، استروفيزيكانىڭ، فيزيولوگيانىڭ سالاسىنداعى عىلىمي-زەرتتەۋ ينستيتۋتتارى، ءماسليحات دەپۋتاتتارى مەن باسقا دا مۇددەلى تاراپتاردى تارتا وتىرىپ مونيتورينگ جۇرگىزىلدى. جۇمىس بارىسىندا دەرەكتەردى زەرتتەۋ، ساۋالنامالاردىڭ ناتيجەلەرى مەن ۋاقىت بەلدەۋىن اۋىستىرعانعا دەيىنگى جانە كەيىنگى كورسەتكىشتەردى سالىستىرۋ بويىنشا كەشەندى ءتاسىل قولدانىلدى»، - دەدى ساۋدا جانە ينتەگراتسيا ءمينيسترى ارمان شاققاليەۆ.
ونىڭ ايتۋىنشا، زەرتتەۋلەر جۇرگىزۋ ادىستەمەسى حالىقتىڭ دەنساۋلىعىنا، ەنەرگيا تۇتىنۋىنا، ەڭبەك ونىمدىلىگىنە، وقۋشىلاردىڭ ۇلگەرىمىنە، قىلمىس دەڭگەيى جانە باسقا دا اسپەكتىلەرگە ۋاقىت بەلدەۋىن وزگەرتۋ اسەرىن باعالاۋدا 40-تان استام مەتريكالار مەن كورسەتكىشتەردى قامتيدى.
دەنساۋلىق ساقتاۋ سالاسى بويىنشا زەرتتەۋ ءارتۇرلى جاس توپتارىن جانە قالا مەن اۋىل حالقىن قامتىدى.
ەنەرگيانى تۇتىنۋ بولىگىندە ەلەكتر ەنەرگياسىن تۇتىنۋ ستاتيستيكاسىن، ونىڭ ىشىندە ەڭ جوعارى جۇكتەمەلەردى، قىسقى شىڭدارعا اسەر ەتۋدى باعالاۋدى جانە بۇكىل ەل بويىنشا جانە كوپ پاتەرلى تۇرعىن ءۇي كەشەندەرى بويىنشا ەلەكتر ەنەرگياسىن تۇتىنۋدى سالىستىرۋ جۇرگىزىلگەنى كورسەتىلگەن.
ەڭبەك قىزمەتى بويىنشا ورىندالعان جۇمىس كولەمى، كەشىگۋ مەن جالقاۋلىق جاعدايلارى، جاراقاتتار مەن ءتارتىپ بۇزۋشىلىقتار سانى قاراستىرىلدى.
«ناتيجەلەر ۋاقىت بەلدەۋىن اۋىستىرۋدىڭ حالىقتىڭ ءومىر ءسۇرۋ دەڭگەيىنە تەرىس اسەر ەتپەيتىنىن كورسەتەدى. سونىمەن قاتار، وڭىرلەردە ءماسليحات دەپۋتاتتارى جۇمىس ۋاقىتىن وڭتايلاندىرۋدى قولداپ، جۇمىس كەستەسىن تۇزەتۋ باستاماسىن كوتەردى»، - دەپ مالىمدەدى مينيستر.
مۇنداي ءۋاج زەرتتەۋ جۇرگىزىلمەي تۇرىپ ايتىلعان ريتوريكامەن ۇندەس شىقتى.
ونىڭ ايتۋىنشا، بۇگىندە شىعىس قازاقستان وبلىسىنىڭ بىرقاتار اۋداندارىندا (كاتونقاراعاي، مارقاكول، ۇلكەن نارىن، زايسان، تارباعاتاي، سامارا، كۇرشىم) جۇمىس كەستەسى ساعات 8.00-دەن 17.30-عا دەيىن تۇزەتىلدى.
سونداي-اق، ول قاجەت بولعان جاعدايدا بۇل تاجىريبەنى جەرگىلىكتى اتقارۋشى ورگاندار باسقا وڭىرلەردە دە قولداناتىنىن ايتتى.
