الماتىدا ءال-فارابي اتىنداعى قازاق ۇلتتىق ۋنيۆەرسيتەتىنە قاراستى ومىربەك جولداسبەكوۆ اتىنداعى ستۋدەنتتەر سارايىنىڭ ءبىر بولىگى وپىرىلىپ ءتۇستى، دەپ حابارلايدى «ادىرنا» ءتىلشىسى.
جەلى قولدانۋشىلارىنىڭ مالىمەتىنشە، وقيعا 23 قىركۇيەك كۇنى ساعات 23:00-دەن كەيىن بولعان. ۆيدەودان ستۋدەنتتەر سارايى قاڭقاسىنىڭ ىشىنەن كوتەرىلگەن شاڭدى كورۋگە بولادى.
24 قىركۇيەكتە ۋنيۆەرسيتەتتىڭ ءباسپاسوز قىزمەتى رەسمي مالىمدەمە جاريالادى. الايدا وندا وپىرىلۋدىڭ ناقتى سەبەبى كورسەتىلمەگەن.
قازۇۋ وكىلدەرىنىڭ ايتۋىنشا، عيماراتتى قايتا جاڭعىرتۋ قاجەتتىلىگى ونىڭ تەحنيكالىق جاعدايىنا بايلانىستى تۋىنداعان. 2023 جىلى اككرەديتتەلگەن ۇيىم جۇرگىزگەن ساراپتامالىق تەكسەرۋ بارىسىندا كوتەرگىش كونسترۋكتسيالاردا ەلەۋلى اقاۋلار مەن زاقىمدار انىقتالعان.
ماماندار باعانالاردىڭ توت باسىپ، ءىشىنارا بۇلىنگەنىن، ريگەلدەردىڭ باعاندارمەن جالعاناتىن تۇيىندەرىنىڭ بۇزىلۋىن، كەيبىر كوتەرگىش ەلەمەنتتىڭ جوق ەكەنىن، سونداي-اق شاتىرداعى مەتالل كونسترۋكتسيالاردىڭ كورروزياعا ۇشىراپ، دەفورماتسيالانعانىن تىركەگەن.
«قولدانىستاعى قۇرىلىس نورمالارىنا سايكەس، عيماراتتارعا اعىمداعى جوندەۋ ءار 3-5 جىل سايىن، ال كۇردەلى جوندەۋ 20-25 جىلدا كەمىندە ءبىر رەت جۇرگىزىلۋى ءتيىس. بۇدان بولەك، 2024 جىلدىڭ قاڭتار ايىندا الماتى مەن وعان ىرگەلەس ايماقتا ءارتۇرلى قارقىندىلىقتاعى بىرنەشە جەر سىلكىنىسى تىركەلدى. سەيسميكالىق بەلسەندىلىك ۇزاق ۋاقىت بويى پايدالانىلعان جانە زاقىمدارى انىقتالعان عيماراتتاردىڭ كونسترۋكتسيالارىنا قوسىمشا اسەر ەتۋى مۇمكىن. بۇل جاعداي ستۋدەنتتەر سارايىنىڭ سەيسميكالىق توزىمدىلىگى مەن قاۋىپسىزدىگىن قامتاماسىز ەتۋ ءۇشىن كەشەندى رەكونسترۋكتسيا جۇرگىزۋ قاجەتتىلىگىن ودان ءارى كۇشەيتە تۇسەدى.
ۋنيۆەرسيتەت ستۋدەنتتەر سارايىنىڭ تاريحي-مادەني قۇندىلىعىن، ونىڭ قوعامدىق ورتالىق جانە مادەني-كوپشىلىك شارالاردى وتكىزەتىن الاڭ رەتىندەگى ماڭىزدىلىعىن تەرەڭ تۇسىنە وتىرىپ، بۇل نىساندى ساقتاپ قالۋ جانە قالپىنا كەلتىرۋ تۋرالى شەشىم قابىلدادى.
رەكونسترۋكتسيا بارىسىنداعى باستى باسىمدىق رەتىندە عيماراتتىڭ كونسترۋكتيۆتىك سەنىمدىلىگىن، سونداي-اق ستۋدەنتتەر، قىزمەتكەرلەر مەن كەلۋشىلەردىڭ قاۋىپسىزدىگىن قامتاماسىز ەتىلۋى بەلگىلەندى. ءال-فارابي اتىنداعى قازاق ۇلتتىق ۋنيۆەرسيتەتى نىساننىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلداۋدى جالعاستىرادى جانە ءتيىستى زەرتتەۋ ناتيجەلەرى مەن الداعى شەشىمدەر تۋرالى اقپارات بەرىپ وتىرادى»،– دەلىنگەن حابارلامادا.
