بالقاش اۋەجايىن رەكونسترۋكتسيالاۋعا قايتارىلعان اكتيۆتەر ەسەبىنەن 945 ملن تەڭگە ءبولىندى، دەپ حابارلايدى "ادىرنا" ۇلتتىق پورتالى.
ۇكىمەتتىڭ ءباسپاسوز قىزمەتىنىڭ مالىمەتىنشە، جۇرگىزىلىپ جاتقان رەكونسترۋكتسيا جولاۋشىلارعا قىزمەت كورسەتۋ ساپاسىن ارتتىرۋعا جانە اۋە ايلاعىنىڭ نەگىزگى پارامەترلەرىن حالىقارالىق ستاندارتتارعا سايكەستەندىرۋگە مۇمكىندىك بەرەدى. جوبا تولىق ىسكە اسقاندا اۋەجايدىڭ وتكىزۋ قابىلەتى 30%-دان اسا وسەدى.
ۆەدومستۆو جۇمىستاردىڭ ەداۋىر بولىگى ورىندالعانىن حابارلاپ وتىر.
اۋەجايدىڭ نەگىزگى عيماراتى مەن قوسالقى نىساندارىنىڭ شاتىرى جوندەلىپ، تەرەزەلەرى اۋىستىرىلعان. كارىز جۇيەسى مەن سۋ قۇبىرىنىڭ نەگىزگى جەلىسى جاڭارتىلدى.
بۇدان بولەك، اۋەجاي قىزمەتىن قامتاماسىز ەتۋ ءۇشىن ءبىرىنشى كەزەكتە قاجەت ارنايى اەرودروم تەحنيكاسىن ساتىپ الۋ جۇمىستارى جۇرگىزىلۋدە. قازىرگى تاڭدا اەرودرومدىق ءورت ءسوندىرۋ كولىگى، جىلجىمالى تراپ، شاعىن اۆتوبۋس جانە اەرودرومعا ارنالعان جانارماي قۇيۋ كولىگى ساتىپ الىنعان.
بەكارىس جانداۋلەت
