Almatyda äl-Farabi atyndaǧy Qazaq ūlttyq universitetıne qarasty Ömırbek Joldasbekov atyndaǧy Studentter saraiynyŋ bır bölıgı opyrylyp tüstı, dep habarlaidy «Adyrna» tılşısı.
Jelı qoldanuşylarynyŋ mälımetınşe, oqiǧa 23 qyrküiek künı saǧat 23:00-den keiın bolǧan. Videodan Studentter saraiy qaŋqasynyŋ ışınen köterılgen şaŋdy köruge bolady.
24 qyrküiekte universitettıŋ baspasöz qyzmetı resmi mälımdeme jariialady. Alaida onda opyryludyŋ naqty sebebı körsetılmegen.
QazŪU ökılderınıŋ aituynşa, ǧimaratty qaita jaŋǧyrtu qajettılıgı onyŋ tehnikalyq jaǧdaiyna bailanysty tuyndaǧan. 2023 jyly akkredittelgen ūiym jürgızgen saraptamalyq tekseru barysynda kötergış konstruksiialarda eleulı aqaular men zaqymdar anyqtalǧan.
Mamandar baǧanalardyŋ tot basyp, ışınara bülıngenın, rigelderdıŋ baǧandarmen jalǧanatyn tüiınderınıŋ būzyluyn, keibır kötergış elementtıŋ joq ekenın, sondai-aq şatyrdaǧy metall konstruksiialardyŋ korroziiaǧa ūşyrap, deformasiialanǧanyn tırkegen.
«Qoldanystaǧy qūrylys normalaryna säikes, ǧimarattarǧa aǧymdaǧy jöndeu är 3-5 jyl saiyn, al kürdelı jöndeu 20-25 jylda kemınde bır ret jürgızıluı tiıs. Būdan bölek, 2024 jyldyŋ qaŋtar aiynda Almaty men oǧan ırgeles aimaqta ärtürlı qarqyndylyqtaǧy bırneşe jer sılkınısı tırkeldı. Seismikalyq belsendılık ūzaq uaqyt boiy paidalanylǧan jäne zaqymdary anyqtalǧan ǧimarattardyŋ konstruksiialaryna qosymşa äser etuı mümkın. Būl jaǧdai Studentter saraiynyŋ seismikalyq tözımdılıgı men qauıpsızdıgın qamtamasyz etu üşın keşendı rekonstruksiia jürgızu qajettılıgın odan ärı küşeite tüsedı.
Universitet Studentter saraiynyŋ tarihi-mädeni qūndylyǧyn, onyŋ qoǧamdyq ortalyq jäne mädeni-köpşılık şaralardy ötkızetın alaŋ retındegı maŋyzdylyǧyn tereŋ tüsıne otyryp, būl nysandy saqtap qalu jäne qalpyna keltıru turaly şeşım qabyldady.
Rekonstruksiia barysyndaǧy basty basymdyq retınde ǧimarattyŋ konstruktiivtık senımdılıgın, sondai-aq studentter, qyzmetkerler men keluşılerdıŋ qauıpsızdıgın qamtamasyz etıluı belgılendı. Äl-Farabi atyndaǧy Qazaq ūlttyq universitetı nysannyŋ qauıpsızdıgın qamtamasyz etu üşın barlyq qajettı şaralardy qabyldaudy jalǧastyrady jäne tiıstı zertteu nätijelerı men aldaǧy şeşımder turaly aqparat berıp otyrady»,– delıngen habarlamada.
