باتىس قازاقستان وبلىسىندا ازاماتتاردىڭ ءومىر ساپاسىن جاقسارتۋ ماقساتىندا اۋقىمدى ينفراقۇرىلىمدىق جوبالار ىسكە اسىرىلۋدا. ەنەرگەتيكا، سۋ جانە كارىز جۇيەلەرىن جاڭارتۋ، تۇرعىن ءۇي قۇرىلىسى مەن لوگيستيكا سىندى باعىتتاردا اتقارىلىپ جاتقان جۇمىستار ءوڭىر تۇرعىندارىنىڭ تۇرمىسىن ەداۋىر جاقسارتۋعا باعىتتالعان.
بقو ەنەرگەتيكا جانە تۇكشب باسقارما باسشىسى بەيىمبەت ءمۋسيننىڭ تاراتقان اقپاراتىنا سۇيەنەر بولساق 2023 جىلدان باستاپ وڭىردە ەنەرگەتيكا جانە تۇرعىن ءۇي-كوممۋنالدىق شارۋاشىلىعى سالاسىندا بىرقاتار ماڭىزدى جوبالار جۇزەگە اسىرىلۋدا. ماسەلەن، ورال قالاسىنىڭ جەراستى سۋ كوزىندە التى جاڭا ۇڭعىما بۇرعىلانىپ، سۋ ءوندىرۋ كولەمى تاۋلىگىنە 40 مىڭ تەكشە مەترگە ارتتى. ال 2025 جىلى جالپى قۇنى 21,6 ميلليارد تەڭگەنى قۇرايتىن ورال جەراستى سۋ كوزدەرىن رەكونسترۋكتسيالاۋ جۇمىستارى باستالدى. بۇل ءوڭىر تۇرعىندارىنىڭ تازا اۋىز سۋمەن قامتاماسىز ەتىلۋىن ارتتىرۋعا باعىتتالعان شارالار. - كارىز جۇيەلەرى دە جاڭارتىلادى. 2023 جىلدان بەرى وبلىس بويىنشا 10,5 ميلليارد تەڭگەگە ء تورت ءىرى نىسان ىسكە قوسىلدى، ال №18ا كارىزدىك سورعى ستانتسياسىنىڭ رەكونسترۋكتسياسى جىل سوڭىنا دەيىن اياقتالىپ، سەكسەن مىڭنان استام ابونەنت تۇراقتى سۋ بۇرۋ جۇيەسىنە قوسىلادى. جىلۋ جۇيەسىندە دە جاڭارۋلار ورىن الۋدا. زاشاعان كەنتىندە 489 ميلليون تەڭگەگە جاڭا قازاندىق سالىنىپ، 60 مىڭنان استام تۇرعىن تۇراقتى جىلۋمەن قامتاماسىز ەتىلدى. سونىمەن قاتار، №1 تۋربواگرەگاتتىڭ جاڭارتىلۋى مەن ەكولوگيالىق تۇرعىدان ءتيىمدى شارالار قابىلداندى، بۇل ءوڭىردىڭ ەنەرگيا تيىمدىلىگىن ارتتىرۋعا مۇمكىندىك بەرەدى،- دەدى باسقارما باسشىسى بەيىمبەت مالىكۇلى.
سۋ مەن تۇرعىن ءۇي قۇرىلىسى
وڭىردەگى سۋمەن قامتۋ ماسەلەسى دە باسىم باعىتتاردىڭ ءبىرى بولىپ تابىلادى. 2025 جىلدىڭ سوڭىنا دەيىن بارلىق اۋىل تۇرعىندارىن تازا اۋىز سۋمەن تولىق قامتاماسىز ەتۋ جوسپارلانىپ وتىر. بۇگىنگى كۇنى وبلىس حالقىنىڭ 98,6%-ى ورتالىقتاندىرىلعان اۋىز سۋمەن قامتاماسىز ەتىلگەن، ال جىل سوڭىنا دەيىن بۇل كورسەتكىش 100%-عا جەتەدى دەپ كۇتىلۋدە. وبلىستىق قۇرىلىس باسقارماسىنىڭ باسشىسى نۇركەن مولداشەۆتىڭ ايتۋىنشا، بۇدان بولەك، ۇستىمىزدەگى جىلعا دەيىن 15 اۋىلدىق ەلدى مەكەندى ساپالى اۋىز سۋمەن قامتۋ ءۇشىن 14 جوبا جۇزەگە اسىرىلادى.- تۇرعىن ءۇي قۇرىلىسىندا دا ەلەۋلى وزگەرىستەر بايقالادى. 2023 جىلى 19,3 ميلليارد تەڭگە قاراستىرىلىپ، 1292 پاتەردىڭ قۇرىلىسى جوسپارلانعان. وسى جىلى 516 پاتەر پايدالانۋعا بەرىلەدى، ونىڭ ىشىندە كوپقاباتتى ۇيلەر مەن اۋىلدىق جەرلەردە جاڭا تۇرعىن ۇيلەر بار. الەۋمەتتىك وسال توپتار ءۇشىن ورال قالاسى مەن وبلىس اۋداندارىندا 555 پاتەر ساتىپ الۋ دا كوزدەلگەن،- دەدى باسقارما باسشىسى نۇركەن ەدىلۇلى.
ينجەنەرلىك ينفراقۇرىلىمدىق جوبالار ءساتتى جۇزەگە اسۋدا
قۇرىلىس باسقاراماسى مالىمدەگەندەي، وڭىردە ينجەنەرلىك كوممۋنيكاتسيالىق ينفراقۇرىلىمدار سالاسىندا ون ەكى نىساننىڭ قۇرىلىسىنا 10,2 ميلليارد تەڭگە ءبولىنىپ، 1588 جەكە تۇرعىن ءۇي قۇرىلىسىن سالۋعا قاجەتتى ينجەنەرلىك جەلىلەرمەن قامتاماسىز ەتۋ جوسپارلانۋدا. بۇل جوبالار تۇرعىنداردىڭ ساپالى كوممۋنالدىق قىزمەتتەرگە قولجەتىمدىلىگىن قامتاماسىز ەتۋ ماقساتىندا جۇزەگە اسىرىلۋدا.
باتىس قازاقستان وبلىسىندا اتقارىلىپ جاتقان ينفراقۇرىلىمدىق جوبالار ءوڭىردىڭ دامۋىنداعى ماڭىزدى قادامداردى كورسەتەدى. سۋ، جىلۋ، كارىز جۇيەلەرىنىڭ جاڭارتىلۋى، تۇرعىن ءۇي قۇرىلىسىنداعى جاڭالىقتار مەن ينجەنەرلىك ينفراقۇرىلىمنىڭ دامۋى ءوڭىر تۇرعىندارىنىڭ ءومىر ساپاسىن ارتتىرىپ، ەكولوگيالىق تۇرعىدان ءتيىمدى شەشىمدەر قابىلدانۋىنا ىقپال ەتەدى. بۇل جۇمىستار بولاشاقتا باتىس قازاقستاننىڭ تۇراقتى دامۋىنا جانە ازاماتتاردىڭ ءال-اۋقاتىنىڭ جاقسارۋىنا سەپ بولماق.
اۆتوموبيل جولدارىن جوندەۋ جۇمىستارى قارقىندى ءجۇرىپ جاتىر
باتىس قازاقستان وبلىسى اۋماعىنداعى اۆتوموبيل جولدارىنىڭ جالپى ۇزىندىعى 6183 شاقىرىمدى قۇرايدى. ونىڭ ىشىندە رەسپۋبليكالىق ماڭىزى بار جولدار – 1349 كم، ال جەرگىلىكتى ماڭىزى بار جولدار – 4834 كم.بۇگىندە رەسپۋبليكالىق ماڭىزى بار اۆتوجولداردىڭ 83 پايىزى، ال جەرگىلىكتى ماڭىزى بار جولداردىڭ 56 پايىزى نورماتيۆتىك جاعدايدا. جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە 2025 جىلدىڭ سوڭىنا دەيىن جەرگىلىكتى ماڭىزى بار جولداردىڭ جاقسى جانە قاناعاتتانارلىق دەڭگەيدەگى ۇلەسىن 62 پايىزعا دەيىن جەتكىزۋ جوسپارلانۋدا. 2024 جىلى وبلىستىق جانە اۋداندىق ماڭىزى بار اۆتوجولداردى جوندەۋگە 34,8 ملرد تەڭگە ء بولىنىپ، ناتيجەسىندە 250,8 شاقىرىم جول جوندەلدى. ونىڭ ىشىندە قايتا جاڭارتۋ جۇمىستارى – 41,5 كم، كۇردەلى جوندەۋ – 103,8 كم، ورتاشا جوندەۋ – 105,5 كم. سونىمەن قاتار، «اۋىل – ەل بەسىگى» باعدارلاماسى اياسىندا 8,8 ملرد تەڭگە قارجى ءبولىنىپ، 88 كم اۋىلىشىلىك جولدارعا جوندەۋ جۇمىستارى جۇرگىزىلگەن.
2025 جىلى دا جول ساپاسىن جاقسارتۋ باعىتىنداعى جۇمىستار جالعاسۋدا. بيىل جالپى سوماسى 45,3 ملرد تەڭگەگە جۋىق قاراجات ەسەبىنەن 263 كم-دەن استام جولدى جوندەۋ جوسپارلانعان. ونىڭ 34,6 ملرد تەڭگەسى (75%) يگەرىلدى.
سونىڭ ىشىندە وبلىستىق ماڭىزى بار 8 جوبا (109,3 كم) جانە اۋداندىق ماڭىزى بار 15 جوبا (111,4 كم) قامتىلعان. بۇل جۇمىستارعا 39,4 ملرد تەڭگە ءبولىنىپ، سونىڭ 30,6 ملرد تەڭگەسى (77%) يگەرىلدى. ناتيجەسىندە 220,7 كم جولدى جوندەۋ كوزدەلگەن. ونىڭ ىشىندە قايتا جاڭارتۋ – 35 كم، كۇردەلى جوندەۋ – 108,7 كم، ورتاشا جوندەۋ – 55,7 كم، اعىمداعى جوندەۋ – 21,3 كم. قازىرگى تاڭدا 207,3 كم (94%) جولدا اسفالت-بەتون جابىنى توسەلىپ، جۇمىستار اياقتالۋعا جاقىن.
«اۋىل – ەل بەسىگى» باعدارلاماسى اياسىندا بيىل 15 ەلدى مەكەندە اۋىلىشىلىك جولداردى جوندەۋگە 5,9 ملرد تەڭگە ء بولىندى، ونىڭ 3,9 ملرد تەڭگەسى (66%) يگەرىلدى. وسى قاراجات ەسەبىنەن 42,3 كم جولعا اسفالتبەتون جابىندى توسەۋ جوسپارلانۋدا. بۇگىنگى تاڭدا 24,5 كم (58%) جولدا جوندەۋ جۇمىستارى اياقتالعان.
