الماتى وبلىسىندا جاس جىگىتتىڭ ولىمىنە قاتىستى قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى.
بۇل تۋرالى وبلىستىق پوليتسيا دەپارتامەنتى مالىمدەدى.
الەۋمەتتىك جەلىلەردە تاراعان اقپاراتقا سايكەس، 11 مامىر كۇنى مارقۇمدى بىرگە بيزنەس اشقان سەرىكتەسى اقشاعا بايلانىستى جانجال كەزىندە اياۋسىز سوققىعا جىققان. جەلى قولدانۋشىسىنىڭ جازۋىنشا، ولار بىرگە كاۋاپحانا اشقان. كۇندىك تابىستى ءبولىسۋ كەزىندە كەلىسپەۋشىلىك تۋىنداعان.
«ونى سونشالىقتى قاتتى ۇرعان، 3,5 ليتر قان جوعالتقان. باسىنان دا دوعال زاتپەن ۇرعان. كەيىن جەدەل جاردەم شاقىرۋدىڭ ورنىنا ۇيىنە اپارىپ، جۋىندىرىپ، كيىمىن اۋىستىرعاننان كەيىن عانا دارىگەر شاقىرعان»، – دەلىنگەن جازبادا.
مارقۇمنىڭ تۋىستارىنىڭ ايتۋىنشا، جىگىت جەدەل جاردەم كولىگىندە جانساقتاۋ بولىمىنە بارا جاتقان جولدا كوز جۇمعان. دارىگەرلەر ونىڭ كوكباۋىرى ىستەن شىققانىن حابارلاعان. سونداي-اق جاقىندارى وقيعا ورنىندا تاعى ءبىر ادامنىڭ بولۋى مۇمكىن ەكەنىن ايتادى.
الماتى وبلىستىق پوليتسيا دەپارتامەنتى اتالعان دەرەك بويىنشا قىلمىستىق ءىس تىركەلىپ، سوتقا دەيىنگى تەرگەۋ باستالعانىن حابارلادى.
«جينالعان ماتەريالدارعا سايكەس، ەر ادامنىڭ جاعدايى ناشارلاپ، جەدەل جاردەم ارقىلى اۋرۋحاناعا جەتكىزىلگەن. كەيىن ول كوز جۇمدى. پوليتسيا قىزمەتكەرلەرى ماڭايداعى مەكەمەلەردىڭ بەينەباقىلاۋ جازبالارىن زەرتتەپ، كۋاگەرلەر مەن وقيعا ورنىنا كەلگەن مەديتسينا قىزمەتكەرلەرىنەن جاۋاپ الدى»، – دەپ مالىمدەدى ۆەدومستۆونىڭ ءباسپاسوز قىزمەتى.
پوليتسيا مارقۇمنىڭ تۋىستارى ايتقان جايتتاردىڭ بارلىعى تەكسەرىلىپ جاتقانىن اتاپ ءوتتى. تەرگەۋ بارىسى وبلىستىق دەپارتامەنت باسشىلىعىنىڭ باقىلاۋىندا ەكەنى حابارلاندى.
