فوتو: Un News
ءچيليدىڭ بۇرىنعى پرەزيدەنتى جانە بۇۇ-نىڭ ادام قۇقىقتارى جونىندەگى بۇرىنعى جوعارعى كوميسسارى ميشەل باچەلەت بۇۇ باس حاتشىسى لاۋازىمىنا تالاسۋدى جالعاستىرمايتىنىن مالىمدەدى. باچەلەت ءوز شەشىمىن Instagram الەۋمەتتىك جەلىسىندە جاريالاعان بەينەجازباسىندا ايتتى، دەپ حابارلايدى "ادىرنا".
«بۇگىن بۇۇ باس حاتشىسى لاۋازىمى ءۇشىن كۇرەستى جالعاستىرماۋ تۋرالى شەشىم قابىلداعانىمدى جاريالايمىن»، – دەدى ول.
بۇرىنعى چيلي پرەزيدەنتى ءوز كانديداتۋراسىن قولداعان برازيليا پرەزيدەنتى لۋيس يناسيۋ لۋلا دا سيلۆا مەن مەكسيكا پرەزيدەنتى كلاۋديا شەينباۋمعا العىس ءبىلدىردى.
باچەلەتتىڭ ايتۋىنشا، ول بۇل ۇدەرىستىڭ ۇلكەن سىناق بولعانىنا قاراماستان، ءوز شەشىمىنە وكىنبەيدى. ونىڭ پىكىرىنشە، كەلەسى بۇۇ باس حاتشىسى لاتىن امەريكاسىنان شىققان ايەل بولۋى جانە ۇيىم جارعىسىنىڭ نەگىزگى قاعيداتتارىن بەرىك ۇستانۋى قاجەت.
ء«بىز كەلەسى باس حاتشى لاتىن امەريكاسىنان شىققان ايەل، شىن مانىندە تاۋەلسىز ءارى ۇيىم جارعىسىنىڭ قاعيداتتارىنا ادال ادام بولۋى كەرەك دەگەن ۇستانىمنىڭ جاھاندىق دەڭگەيدە ورنىعۋىنا ءوز ۇلەسىمىزدى قوستىق»، – دەدى باچەلەت.
قازىرگى تاڭدا بۇۇ باس حاتشىسى قىزمەتىنە بىرنەشە كانديدات ۇمىتكەر بولىپ وتىر. ولاردىڭ قاتارىندا حالىقارالىق اتوم ەنەرگياسى اگەنتتىگىنىڭ باس ديرەكتورى رافاەل گروسسي (ارگەنتينا), بۇۇ ساۋدا جانە دامۋ جونىندەگى كونفەرەنتسياسىنىڭ باس حاتشىسى رەبەكا گرينسپان (كوستا-ريكا), سەنەگالدىڭ بۇرىنعى پرەزيدەنتى ماكي سال، ەكۆادوردىڭ بۇرىنعى سىرتقى ىستەر جانە قورعانىس ءمينيسترى ماريا فەرناندا ەسپينوسا گارسەس، گايانانىڭ بۇۇ جانىنداعى تۇراقتى وكىلى كارولين رودريگەس-بيركەتت جانە ەكۆادوردىڭ اقش پەن فرانتسياداعى بۇرىنعى ەلشىسى يۆونن باكي بار.
