Фото: Un News
Чилидің бұрынғы президенті және БҰҰ-ның адам құқықтары жөніндегі бұрынғы жоғарғы комиссары Мишель Бачелет БҰҰ Бас хатшысы лауазымына таласуды жалғастырмайтынын мәлімдеді. Бачелет өз шешімін Instagram әлеуметтік желісінде жариялаған бейнежазбасында айтты, деп хабарлайды "Адырна".
«Бүгін БҰҰ Бас хатшысы лауазымы үшін күресті жалғастырмау туралы шешім қабылдағанымды жариялаймын», – деді ол.
Бұрынғы Чили президенті өз кандидатурасын қолдаған Бразилия президенті Луис Инасиу Лула да Силва мен Мексика президенті Клаудия Шейнбаумға алғыс білдірді.
Бачелеттің айтуынша, ол бұл үдерістің үлкен сынақ болғанына қарамастан, өз шешіміне өкінбейді. Оның пікірінше, келесі БҰҰ Бас хатшысы Латын Америкасынан шыққан әйел болуы және ұйым Жарғысының негізгі қағидаттарын берік ұстануы қажет.
«Біз келесі Бас хатшы Латын Америкасынан шыққан әйел, шын мәнінде тәуелсіз әрі Ұйым Жарғысының қағидаттарына адал адам болуы керек деген ұстанымның жаһандық деңгейде орнығуына өз үлесімізді қостық», – деді Бачелет.
Қазіргі таңда БҰҰ Бас хатшысы қызметіне бірнеше кандидат үміткер болып отыр. Олардың қатарында Халықаралық атом энергиясы агенттігінің бас директоры Рафаэль Гросси (Аргентина), БҰҰ Сауда және даму жөніндегі конференциясының бас хатшысы Ребека Гринспан (Коста-Рика), Сенегалдың бұрынғы президенті Маки Саль, Эквадордың бұрынғы сыртқы істер және қорғаныс министрі Мария Фернанда Эспиноса Гарсес, Гайананың БҰҰ жанындағы тұрақты өкілі Каролин Родригес-Биркетт және Эквадордың АҚШ пен Франциядағы бұрынғы елшісі Ивонн Баки бар.
