Air Astana اۋە كومپانياسىنىڭ جولاۋشىسى الماتىدان ۆەتنامنىڭ دانانگ قالاسىنا ۇشقاننان كەيىن قول جۇگىندەگى 3400 اقش دوللارى جوعالعانىن ايتتى، دەپ حابارلايدى "ادىرنا" ءتىلشىسى.
اننا ماگنەلي تبيليسيدەن الماتى ارقىلى دانانگ قالاسىنا بارعان. ونىڭ ايتۋىنشا، وتباسىنا تيەسىلى 3400 دوللار قول جۇگىندەگى كونۆەرتتە بولعان. الايدا ۆەتنامعا جەتىپ، قوناقۇيگە ورنالاسقاننان كەيىن اقشانىڭ جوعالعانىن بايقاعان.
جولاۋشىنىڭ سوزىنشە، كونۆەرتتىڭ ىشىنەن دوللاردىڭ ورنىنا ءمالاۆيدىڭ نومينالى ءبىر دوللارلىق بانكنوتتارى شىققان. ول جوعالعان قاراجات وتباسىنىڭ ۆەتنامعا قونىس اۋدارۋ ءۇشىن الىپ كەلگەن نەگىزگى قارجىسى بولعانىن اتاپ ءوتتى.
«بىزدە قالعان اقشا جوقتىڭ قاسى. الماتى–دانانگ رەيسىمەن ۇشىپ كەلگەننەن كەيىن 3400 دوللارىمىزدىڭ جوعالعانىن انىقتادىق. بۇل تبيليسيدەن ۆەتنامعا قونىس اۋدارۋ ءۇشىن الىپ كەلگەن قاراجاتىمىزدىڭ باسىم بولىگى ەدى»، – دەدى جولاۋشى.
اننا ماگنەلي بولعان جاعدايعا بايلانىستى Air Astana وكىلدەرىنە، اۋەجايدىڭ قاۋىپسىزدىك قىزمەتىنە جانە دانانگ پوليتسياسىنا جۇگىنگەنىن ايتتى. ونىڭ مالىمەتىنشە، رەيستەگى كەيبىر جولاۋشىلار وقيعاعا قاتىسى بولۋى مۇمكىن ادامنىڭ سىرتقى كەلبەتىن سيپاتتاپ بەرگەن.
الايدا جولاۋشىنىڭ ايتۋىنشا، ۆەتنام پوليتسياسى اۋدارماشىسىز ارىز قابىلداماعان. وسىعان بايلانىستى ول دانانگتا تۇراتىن، ورىس جانە ۆەتنام تىلدەرىن بىلەتىن ادامداردان كومەك سۇرادى.
Air Astana كومپانياسى جولاۋشىنىڭ جاعدايىنا بايلانىستى وكىنىش ءبىلدىردى. اۋە تاسىمالداۋشىسىنىڭ مالىمەتىنشە، وقيعانى تەرگەۋ قۇقىق قورعاۋ ورگاندارىنىڭ قۇزىرەتىنە جاتادى.
كومپانيا قىلمىسقا قاتىسى بار ادامداردى انىقتاۋ، كىنالىلەردى جاۋاپكەرشىلىككە تارتۋ جانە كەلتىرىلگەن شىعىندى وتەۋ ماسەلەلەرى بويىنشا جولاۋشى قۇقىق قورعاۋ ورگاندارىنا رەسمي تۇردە ارىز بەرۋى قاجەت ەكەنىن حابارلادى.
سونداي-اق Air Astana قىلمىس قازاقستان اۋماعىنان تىس جەردە جاسالعان جاعدايدا نەمەسە ونىڭ ناقتى قاي جەردە بولعانىن انىقتاۋ مۇمكىن بولماعان كەزدە، ءىستىڭ تەرگەۋ اياقتالعان جەردەگى سوتتا قارالۋى مۇمكىن ەكەنىن ايتتى.
