2016 جىلى جەر شارىن اينالىپ ۇشىپ، تاريحقا ەنگەن الەمدەگى ەڭ ءىرى كۇن باتارەيالارىمەن جۇمىس ىستەيتىن Solar Impulse 2 ۇشاعى اپاتقا ۇشىرادى، دەپ حابارلايدى «ادىرنا» ءتىلشىسى Popular Science-قا سىلتەمە جاساپ.
اقش ۇلتتىق كولىك قاۋىپسىزدىگى كەڭەسىنىڭ مالىمەتىنشە، وقيعا سالدارىنان ەشكىم زارداپ شەكپەگەن. الايدا بۇل اپات اۆياتسيا تاريحىنداعى ەڭ اۋقىمدى ءارى باتىل جوبالاردىڭ ءبىرىنىڭ اياقتالۋىنا سەبەپ بولدى.
جوبانىڭ باستاماشىسى — تەڭىز تەرەڭدىگىن زەرتتەۋشى وگيۋست پيكاردىڭ نەمەرەسى ءارى ماريان شۇڭعىماسىنىڭ تۇبىنە العاش جەتكەن جاك پيكاردىڭ ۇلى بەرتران پيكار بولدى. ونىڭ ماقساتى كوممەرتسيالىق پايدا تابۋ ەمەس، تۇراقتى ەنەرگەتيكانى ناسيحاتتاۋ ەدى.
ۇشاقتىڭ العاشقى نۇسقاسى — Solar Impulse 1 2009 جىلى العاش رەت كوككە كوتەرىلگەن. ال Solar Impulse 2 ۇشاعىنىڭ قۇرىلىسى 2011 جىلى باستالعان.
ۇشاق تەحنيكالىق سيپاتتامالارىمەن ەرەكشە كوزگە ءتۇستى. ونىڭ سالماعى كومىرتەكتى تالشىقتان جاسالعان قۇرىلىمىنىڭ ارقاسىندا نەبارى 2,3 توننا بولدى. 2016 جىلى Solar Impulse 2 تاريحتا كۇن ەنەرگياسىمەن جۇمىس ىستەيتىن جانە جەر شارىن تولىق اينالىپ ۇشقان العاشقى ۇشاق رەتىندە قالدى. بەرتران پيكار مەن ونىڭ سەرىكتەسى اندرە بورشبەرگ 17 رەت ايالداپ، ساعاتىنا 49-100 شاقىرىم جىلدامدىقپەن ۇشقان.
2019 جىلى Solar Impulse قورى ۇشاقتى Skydweller Aero كومپانياسىنا ساتقان. جاڭا يەلەرى ونى اسكەري باقىلاۋ ماقساتىندا — رادارلارمەن، وپتيكالىق جۇيەلەرمەن جانە بايلانىس قۇرىلعىلارىمەن جابدىقتاپ پايدالانۋدى جوسپارلاعان.
جاڭعىرتۋدان كەيىن اپپارات يسپانيا مەن اقش باعىتىندا اۆتونومدى ۇشۋلار جاساعان. الايدا 4 مامىر كۇنى باسقارۋدان شىعىپ، اپاتقا ۇشىراعان.
كەلىسىم بويىنشا ۇشاق كەيىن شۆەيتسارياعا قايتارىلىپ، شۆەيتساريا كولىك مۇراجايى ەكسپوناتىنا اينالۋى ءتيىس بولعان. بەرتران پيكار مەن اندرە بورشبەرگ «ماڭىزدى تەحنولوگيالىق كوشباسشىدان» ايىرىلعاندارىنا وكىنىش ءبىلدىردى.
