بۇرىنعى بانكير جومارت ەرتاەۆ سوت تاعايىنداعان جازاسىن تولىق وتەۋىنە بايلانىستى بوستاندىققا شىقتى. بۇل تۋرالى ءىىم قىلمىستىق-اتقارۋ جۇيەسى كوميتەتى ايتتى، دەپ حابارلايدى «ادىرنا» ءتىلشىسى.
«قولدانىستاعى زاڭناماعا سايكەس، اتالعان سوتتالعان ازاماتقا قاتىستى التى جىل مەرزىمگە اكىمشىلىك قاداعالاۋ جۇرگىزىلەدى. اكىمشىلىك قاداعالاۋ – باس بوستاندىعىنان ايىرۋ ورىندارىنان بوساتىلعاننان كەيىن ادامنىڭ مىنەز-قۇلقىن ىشكى ىستەر ورگاندارى تاراپىنان زاڭدا بەلگىلەنگەن تارتىپپەن باقىلاۋ»، – دەلىنگەن حابارلامادا.
جومارت ەرتاەۆ 1972 جىلى الماتى وبلىسىندا دۇنيەگە كەلگەن. 2000-جىلداردىڭ باسىندا ول «اليانس بانكتى» باسقارعان، كەيىننەن بتا بانكتە جانە ەۋرازيالىق بانكتە قىزمەت اتقارعان. سونداي-اق «الما-تۆ» جانە Alma Group كومپانيالارىنا جەتەكشىلىك ەتكەن.
2009 جىلى ەرتاەۆ «اليانس بانكتەن» 1,1 ملرد اقش دوللارىن جىمقىرۋ ءىسى بويىنشا ۇستالعان. تەرگەۋ يزولياتورىندا توعىز اي وتىرعاننان كەيىن وعان شارتتى جازا تاعايىندالعان.
2020 جىلى ول RBK Bank-تەن 144 ملرد تەڭگە جىمقىرعانى ءۇشىن 11 جىلعا سوتتالعان. 2021 جىلى جازا مەرزىمى توعىز جىلعا دەيىن قىسقارتىلعان.
2025 جىلدىڭ كۇزىندە ەرتاەۆ راقىمشىلىق اياسىندا شارتتى تۇردە مەرزىمىنەن بۇرىن بوساتىلعان بولاتىن. الايدا كەيىن شارتتى تۇردە مەرزىمىنەن بۇرىن بوساتۋ تۋرالى قاۋلىنىڭ كۇشى جويىلىپ، ول قايتادان تۇزەۋ مەكەمەسىنە قايتارىلدى.
