ىشكى ىستەر ءمينيسترى ەرجان سادەنوۆ بۇرىنعى بانكير جومارت ەرتاەۆتىڭ كولونيادان بوساتىلۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
جۋرناليستەر مينيستردەن 144 ميلليارد تەڭگەنى جىمقىردى دەپ ايىپتالىپ، 11 جىل5ا سوتتالعان ادامنىڭ قالايشا 4 جىلدان كەيىن راقىمشىلىقپەن بوستاندىققا شىققانىن سۇرادى. سادەنوۆ مۇنداي شەشىمدى سوت قابىلداعانىن جانە ونى ءوزى تۇسىندىرە المايتىنىن ايتتى.
“ول دا قۇقىلى. راقىمشىلىققا سايكەس وسىنداي شەشىم قابىلداندى. بىراق وعان شەكتەۋ بار، ياعني پروباتسيالىق باقىلاۋ قويىلادى. ول – مەملەكەتكە قارىز ادام. مەنىڭ ويىمشا، مۇندا اپەللياتسياعا، ياعني نارازىلىق ەنگىزۋگە بولادى. بۇل – سوت شەشىمى، مەن ونى تۇسىندىرە المايمىن”، – دەدى سادەنوۆ.
مينيستردەن ەرتاەۆتىڭ شىنىندا دا كونستيتۋتسيانىڭ 30 جىلدىعىنا وراي جاريالانعان راقىمشىلىق اياسىندا بوساتىلعان-بوساتىلماعانى دا سۇرالدى.
“مەن تەك سوت شەشىمىمەن بۇل ادامعا راقىمشىلىق جاسالعانىن راستاي الامىن. سونىمەن قاتار پروباتسيالىق باقىلاۋ ساقتالادى”، – دەپ جاۋاپ بەردى سادەنوۆ.
بۇگىن بۇرىنعى بانكير جومارت ەرتاەۆتىڭ كولونيادان بوساعانى بەلگىلى بولدى. اقپاراتتى ءىىم قىلمىستىق-اتقارۋ جۇيەسى كوميتەتى راستادى. وندا ەرتاەۆتىڭ الداعى ۋاقىتتا باقىلاۋ مەن قاداعالاۋ ءۇشىن پروباتسيا قىزمەتىنىڭ ەسەبىنە قويىلعانى ايتىلدى.
ايتا كەتەيىك، 2020 جىلدىڭ قاراشاسىندا جومارت ەرتاەۆ RBK Bank-تەن 144 ميلليارد تەڭگەنى جىمقىرعانى ءۇشىن ايىپتالىپ، 11 جىلعا سوتتالعان ەدى. ونىمەن بىرگە تاعى 35 ادامعا ۇكىم شىققان.
2018 جىلى جومارت ەرتاەۆ قازاق ۇلتشىل-پاتريوتتارى تاراپىنان قاۋىپ تونگەنىن ايتىپ، رەسەيدەن ساياسي باسپانا سۇراعان ەدى.
