اباي وبلىسىندا ايەلدەر كولونياسىنان الاياقتىق ءۇشىن جازاسىن وتەگەن 26 جاستاعى ايەل بوستاندىققا شىقتى. كولونيا قاقپاسىندا ونى جەتىسۋ وبلىسىنان ارنايى كەلگەن سۇيىكتى جارى كۇتىپ الدى. بۇل تۋرالى Polisia.kz جازدى، دەپ حابارلايدى "ادىرنا".
اقپاراتقا سايكەس، سوت ۇكىمىمەن ايەلگە بەس جىل باس بوستاندىعىنان ايىرۋ جازاسى كەسىلگەن بولاتىن. جازاسىن وتەۋ كەزىندە ول مەكەمەدە اسپازدىڭ كومەكشىسى بولىپ ەڭبەك ەتىپ، وزىنە تاپسىرىلعان جۇمىستاردى ۇقىپتىلىقپەن ورىنداپ، ەڭبەكقور ءارى جاۋاپتى قىزمەتكەر رەتىندە تانىلدى.
ەرلى-زايىپتىلاردىڭ جۇزدەسۋى جۇرەك تەبىرەنتەرلىك اسەر قالدىردى – ولار قۋانىشتىڭ كوز جاسىن تىيا الماي، ءبىر-ءبىرىن قۇشاعىنان ۇزاق ۋاقىت بوساتا المادى. بۇل – تەك ەر مەن ايەلدىڭ كەزدەسۋ ءساتى عانا ەمەس، انانىڭ ءوز ۇيىنە، وتباسىنا، ءومىرىنىڭ مانىنە قايتا ورالۋى ەدى.
بوستاندىققا شىققان ايەل مەكەمە اكىمشىلىگىنە قولداۋ مەن تۇسىنىستىك تانىتقاندارى، سونداي-اق قيىن كۇندەردە ەڭبەك ەتىپ، رۋحاني كۇش تابۋعا مۇمكىندىك جاساعاندارى ءۇشىن العىسىن ءبىلدىردى.
«ەڭ باستىسى – جاقىندارىمنىڭ قاسىمدا بولۋى. مەن وسى ءساتتى كۇن سايىن ارماندادىم. سوتتالعانعا دەيىن ماكياج سۋرەتشىسى بولىپ جۇمىس ىستەدىم، ەندى سۇيىكتى ىسىمە قايتا ورالعىم كەلەدى. ادامداردى ادەمى ەتىپ، ولارعا قۋانىش سىيلاۋ – مەنىڭ ومىرلىك ماقساتىم. ارينە، جاستىقتىڭ ەڭ جاقسى جىلدارى تۇرمە قابىرعاسىندا ءوتتى، بىراق بۇل ومىرلىك ساباق ماعان كوپ نارسە ۇيرەتتى. ەندىگى بار ارمانىم — بالالارىم مەن وتباسىم ءۇشىن جاڭا ءومىر باستاۋ»، – دەپ ءبولىستى ول شىنايى سەزىمىن.
№23 مەكەمە اكىمشىلىگى ايەلدەردىڭ قوعامعا بەيىمدەلۋىنە ەرەكشە ءمان بەرەتىنىن اتاپ ءوتتى.
ء«بىز سوتتالعانداردى تەك جازاسىن وتەۋ كەزىندە عانا ەمەس، بوستاندىققا شىعۋعا دايىندىق كەزەڭىندە دە قولداۋعا تىرىسامىز. ولارعا ەڭبەك ەتۋگە، جاڭا داعدىلار مەن ماماندىقتاردى مەڭگەرۋگە جاعداي جاسايمىز. باستى ماقساتىمىز — ولاردىڭ ەركىندىككە شىققاننان كەيىن ءومىرىن جاڭا پاراقتان باستاپ، وتكەن قاتەلىكتەرىن قايتالاماۋى»، – دەدى مەكەمە باستىعىنىڭ ورىنباسارى انار سابيەۆا.
