اقمولا وبلىسىنىڭ 21 سپورتشىسى جاپونيادا وتەتىن XX جازعى ازيا ويىندارىندا قازاقستان نامىسىن قورعايدى. ولار بوكس، ترياتلون، باسكەتبول، ۆولەيبول جانە ساداق اتۋ سىندى سپورتتىڭ توعىز تۇرىنەن باق سىنايدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق دەنە شىنىقتىرۋ جانە سپورت باسقارماسىنىڭ باسشىسى ارداق تولەندين مالىمدەدى.
باسقارما باسشىسىنىڭ مالىمەتىنشە، ويىندار 19 قىركۇيەك پەن 4 قازان ارالىعىندا ناگويا قالاسى مەن ايتي پرەفەكتۋراسىندا وتەدى. اقمولا وبلىسىنىڭ قۇرامىندا بوكستان ازيا چەمپيونى ورازبەك اسىلقۇلوۆ پەن ازيا ويىندارىنىڭ ەكى دۇركىن جۇلدەگەرى ايان بەيسەنباەۆ بار. سونداي-اق وبلىستىڭ تاعى سەگىز سپورتشىسى قازاقستاننىڭ باسكەتبولدان ايەلدەر قۇراماسىنا ەندى.
«ازيا ويىندارىنا قاتىسۋ - سپورتشىلار مەن جاتتىقتىرۋشىلاردىڭ ۇلكەن ەڭبەگىنىڭ ناتيجەسى. قازىر باستى مىندەت - جيناعان سپورتتىق بابىمىزدى ساقتاپ، كوماندانىڭ جارىسقا لايىقتى قاتىسۋىنا بارلىق جاعدايدى جاساۋ»، - دەدى ارداق تولەندين.
2023 جىلى حانچجوۋدا وتكەن الدىڭعى ازيا ويىندارىندا اقمولا وبلىسىنىڭ اتىنان 15 سپورتشى ونەر كورسەتتى. سول كەزدە ءوڭىر قورجىنىنا ەكى مەدال ءتۇستى: كارينا يبراگيموۆا بوكستان كۇمىس، ال ايان بەيسەنباەۆ ترياتلوننان قولا جۇلدە يەلەندى. بيىل وبلىس قۇرامىنداعى سپورتشىلار سانى 21-گە جەتتى.
«سپورتشىلارىمىزدىڭ ويىنداردا رەسپۋبليكالىق جانە حالىقارالىق جارىستاردا كورسەتكەن دايىندىق دەڭگەيىن كورسەتە العانى ءبىز ءۇشىن ماڭىزدى. بارلىق كومانداعا لايىقتى ونەر كورسەتۋدى تىلەيمىز»، - دەدى ارداق تولەندين.
