كوكشەتاۋدا №6 مەكتەپ-ليتسەيىنىڭ دارەتحانالارىنا بەينەباقىلاۋ كامەرالاردىڭ ورناتىلۋى، اتا-انالاردىڭ نارازىلىعىن تۋدىردى، دەپ حابارلايدى "ادىرنا" ۇلتتىق پورتالى sinegor.kz-كە سىلتەمە جاساپ.
"№6 مەكتەپتە دارەتحانالارعا كامەرالار ورناتىلدى. بۇل جانتۇرشىگەرلىك جاعداي! مەكتەپ اكىمشىلىگى قايدا قاراپ وتىر؟ ولار اتا-انالاردان رۇقسات العان جوق. كامەرا جوعارى ىلىنگەن، كابينانىڭ ىشىندە ادامنىڭ بەينەسى، باسى كورىنۋى مۇمكىن،" دەپ كەيبىر اتا-انالار نارازىلىقتارىن ءبىلدىردى.
مەكتەپ اكىمشىلىگى بەينەكامەرالار ۇلداردىڭ دارەتحانالارىنا وقۋشىلاردىڭ قاۋىپسىزدىگىن قامتاماسىز ەتۋ ماقساتىندا ورناتىلعانىن جانە بالالاردىڭ قۇپيالىلىق قۇقىعىن ساقتاۋ شارتىمەن ءبىلىم ءبولىمىنىڭ باسشىسىمەن الدىن الا كەلىسىلگەنىن ءتۇسىندىردى.
"كامەرالار كابينالاردىڭ ىشكى كەڭىستىگى بەينەباقىلاۋ ايماعىنا تۇسپەيتىندەي ەتىپ ورناتىلعان. مۇنداي شەشىمگە بۇزاقىلىق فاكتىلەرى، توبەلەس جانە جاسوسپىرىمدەردىڭ جانجالداسۋ وقيعالارى سەبەپ بولدى. 25 قاراشاعا سىنىپتارداعى اتا-انالار كوميتەتى مەن قامقورشىلىق كەڭەس وكىلدەرىنىڭ جينالىسى بەلگىلەندى. كەزدەسۋ بارىسىندا بالالاردىڭ قۇقىقتارىنىڭ بۇزىلماعانىن راستايتىن بەينەجازبا كورسەتىلەدى", - دەلىنگەن حابارلامادا.
